پاک فضائیہ تے ائیر ڈیفنس دی وقتی کارروائی، افغان رجیم دے سارے 8 ڈرونز مار سٹئے

راولپنڈی۔23 ستمبر (اے پی پی) افواجِ پاکستان دے مستعد تے فعال ائیرڈیفنس سسٹم پاکستانی فضائی حدود دی خلاف ورزی کرݨ آلے افغان طالبان رجیم دے سارے8 ڈرونز کوں فضا اچ ہی تباہ کر ݙتا۔ سکیورٹی ذرائع موجب ٻدھ دی فجر افغان طالبان رجیم دی طرفوں 8 ڈرونز پاکستان دی فضائی حدود اچ داخل کیتے ڳئے جنہاں دا مقصد عوامی مقامات کوں نشانہ بݨاوݨا ہئی، تاں جو پاک فضائیہ تے دفاعی نظام فوری ردعمل ݙیندے ایں بزدلانہ کوشش کوں پیشہ ورانہ انداز اچ ناکام بݨا ݙتا۔ کارروائی دے دوران 4 ڈرونز کوں طورخم بارڈر دے نیڑے علاقیں جݙاں جو 4 ڈرونز کوں ضلع کوہاٹ نال متصل سرحدی پہاڑی علاقیں اچ نشانہ بݨا تے مار سٹیا ڳئے۔ سکیورٹی ذرائع واضح کیتا جو اے فضائی دراندازی افغان رجیم دی طرفوں دہشت گرداں دی کھلم کھلا سرپرستی دا ھک ٻیا واضح ثبوت اے۔ واضح رہے جو گزریل رات وی پاک فوج کرم سیکٹر تے بلااشتعال فائرنگ دے جواب اچ سرحد پار افغان طالبان رجیم دے ٻہوں ٹھکاݨیں تے مورچیں کوں مؤثر جوابی کارروائی اچ تباہ کیتا ہئی۔