تحریکِ انصاف طالبان آئیڈیالوجی تے کم کریندی پئی اے، خیبر پختونخوا اچ دہشت گردی دی ذمہ دار پی ٹی آئی اے، احتجاج تے دھرنیاں نال قیدی دی رہائی نہ تھیسی، عطا اللہ تارڑ

اسلام آباد۔10 اکتوبر (اے پی پی) وفاقی وزیرِ اطلاعات تے نشریات عطا اللہ تارڑ آکھیا جو خیبر پختونخوا اچ دہشت گردی دی ذمہ دار تحریکِ انصاف اے جیڑھی طالبان آئیڈیالوجی تے کم کریندی پئی اے اتے دہشت گرداں دی سہولت کار اے، تحریکِ انصاف دہشت گرداں کوں خیبر پختونخوا دی رہائشی آبادیاں اچ لا تے آباد کیتا، احتجاج تے دھرنیاں نال قیدی دی رہائی نہ تھیسی، گزریل ساݙھے 13 سالاں دے دوران صوبے اچ گورننس تے ترقی دی بجائے سیاسی انتشار کوں فروغ ݙتا ڳیا۔ ہفتے کوں اتھاں پی ٹی وی ہیڈ کوارٹرز اچ وزیراعظم دے کوآرڈینیٹر برائے اطلاعات تے خیبر پختونخوا اختیار ولی خان تے رکنِ صوبائی اسمبلی خیبر پختونخوا جلال خان دے نال پریس کانفرنس توں خطاب کریندیں ہوئیں وفاقی وزیرِ اطلاعات آکھیا جو خیبر پختونخوا ہک زمانے اچ اساݙے کیتے باعثِ فحر صوبہ ہا جتھاں دنیا بھر توں سیاح آندن تے اتھاں دے سیاحتی ڄہیں توں لطف اندوز تھیندے ہن۔ صوبہ امن دا گہوارہ ہا اتے ہر لحاظ نال مثالی سہولتاں دا حامل ہا۔ گزریل ساݙھے 13 سالاں دے دوران پی ٹی آئی دی حکومت صوبے دے عوام کوں پتھر دے زمانے اچ دھکیل ݙتے۔ وفاقی وزیرِ اطلاعات سوال کیتا جو وزیراعلیٰ خیبر پختونخوا سہیل آفریدی گورننس کیتے کتنے گھنٹے تے کتنے ݙینھ صرف کیتے؟ انہاں آکھیا جو وزیراعظم شہباز شریف آئی ٹی پارک دا افتتاح کیتا جتھاں انکیوبیشن سینٹرز قائم کیتے ڳئے، نجی شعبے کوں آئی ٹی سہولیات فراہم کیتیاں ڳئیاں اتے یونیورسٹی دے طالب علماں کیتے جدید مہارتاں سکھݨ دا باقاعدہ نظام وضع کیتا ڳیا۔ انہاں آکھیا جو اگر وزیراعظم شہباز شریف گورننس تے توجہ ݙیوݨ دی بجائے احتجاج دی سیاست کیتی ہوندی، اجلاس منعقد نہ کیتے ہوندے اتے منصوبے دی پیشرفت دی نگرانی نہ کیتی ہوندی تاں آئی ٹی پارک مکمل نہ تھیندا۔ ایں منصوبے نال ملکی جی ڈی پی اچ اضافے، آئی ٹی مہارتاں دے فروغ، آئی ٹی سیکٹر دی ترقی تے آئی ٹی برآمدات اچ اضافے اچ مدد ملسی۔ وفاقی وزیرِ اطلاعات آکھیا جو وفاقی حکومت عوام کوں ریلیف فراہم کرݨ کیتے فیول ریلیف سکیم متعارف کرائی جیندے توں ہک کروڑ توں ودھ لوک مستفید تھی چکے ہن۔ انہاں آکھیا جو عوامی تجاویز دی روشنی اچ پنج لیٹر دی شرط ختم کیتی ڳئی جݙانجو 15 سال پرانی موٹر سائیکل دی بجائے 20 سال پرانی موٹر سائیکل تک کوں ایں سکیم اچ شامل کیتا ڳیا۔ اے سکیم کامیابی نال جاری رہی تے ایں دی بہتری اچ عوامی تجاویز اہم کردار ادا کیتے۔ وفاقی وزیرِ اطلاعات آکھیا جو اگر وزیراعظم شہباز شریف وی عوامی خدمت دی بجائے احتجاج تے سیاسی سرگرمیاں اچ مصروف راہندے تاں ترقیاتی منصوبے مکمل نہ تھیندے۔انہاں آکھیا جو پی ٹی آئی دے بانی چیئرمین جݙݨ وزیراعظم ہن تاں دوپہر 12 وجے ہیلی کاپٹر دے ذریعے دفتر آندے تے شام پنج وجے گھر چلے ویندے ہن۔ وہ آہدے ہن جو انہاں کوں ایکسچینج ریٹ دا علم نہیں تے ایں بارے اچ انہاں دی اہلیہ انہاں کوں ݙسیندی اے۔ وفاقی وزیرِ اطلاعات سوال کیتا جو اساں اتھاں عوام دی خدمت کیتے آئے ہئیں یا انتشار پھیلاوݨ کیتے؟ انہاں آکھیا جو اگر وزیراعلیٰ خیبر پختونخوا سہیل آفریدی دی کارکردگی ݙٹھی ون٘ڄے تاں گورننس دے حوالے نال انہاں دی کارکردگی زیرو اے۔ اگر صوبائی حکومت گورننس تے توجہ ݙتی ہندی تاں لکی مروت توں مردان تے نوشہرہ توں صوابی تئیں جدید آئی ٹی پارکس تے آئی ٹی مراکز قائم کیتے ویندے، یونیورسٹیاں تے سکولاں کوں ترقی ݙتی ویندی اتے صحت دیاں سہولتاں کوں اپ گریڈ کیتا ویندا۔ وفاقی وزیرِ اطلاعات آکھیا جو صوبائی حکومت دی صحت دے شعبے تے توجہ صفر اے کیونجو ایں دی ترجیحات سازشاں تے ہک قیدی دی رہائی دے گرد گھمدن۔ انہاں آکھیا جو خیبر پختونخوا دے عوام غربت، صحت دیاں ناکافی سہولتاں تے معیاری تعلیم دی عدم دستیابی دے باعث مشکلاں دا شکار ہن۔ سڑکاں، پلیں، انڈر پاسز تے ٻئے بنیادی ڈھانچے دی عدم ترقی وی عوام کوں محرومیاں اچ جکڑ رکھے جݙانجو دہشت گردی صوبے دے عوام کیتے ہک وِی آزمائش اے۔ وفاقی وزیرِ اطلاعات آکھیا جو اے سلسلہ آخر کݙاں تئیں جاری رہسی جو فوج علاقہ کلیئر کراوے، امن بحال کرے، خوشحالی واپس آوے تے ولا دہشت گرداں کوں ولا ڳھن آ تے آباد کر ݙتا ون٘ڄے۔ انہاں آکھیا جو اج وی آپݨے موقف تے قائم ہاں جو تحریکِ انصاف دہشت گرداں دی ساریاں توں وِی سہولت کار تے انہاں دے نال ذہنی ہم آہنگی رکھیندی اے۔ وفاقی وزیرِ اطلاعات عطا اللہ تارڑ آکھیا جو تحریکِ انصاف دی نظریاتی سوچ طالبان دی آئیڈیالوجی نال مطابقت رکھدی اے جیندے تحت عورتاں کوں گھراں توں ٻاہر نکلݨ دی اجازت نئی ݙتی ویندی۔  انہاں آکھیا جو صوبے دا وزیراعلیٰ نااہل اے جیندے اچ دہشت گرداں دا مقابلہ کرݨ دی تاں پرے دی ڳالھ، انہاں دے خلاف ڳالھ کرݨ دی وی جرات نئی۔  انہاں آکھیا جو وزیراعلیٰ خیبر پختونخوا صوبے دے عوام کوں ݙسن جو او گورننس تے کتنے گھنٹے صرف کیتے؟ وزیراعلیٰ عوام کوں کوئی ہک وݙا ہسپتال، وݙی یونیورسٹی، وݙی شاہراہ یا نوجوانوں کیتے آئی ٹی مہارتاں دا کوئی وݙا منصوبہ ڳݨاون۔  وفاقی وزیرِ اطلاعات آکھیا جو خیبر پختونخوا حکومت اے رقم عوامی فلاح تے گورننس دی بجائے احتجاجی سرگرمییاں تے صرف کیتی۔ انہاں آکھیا جو صوبائی حکومت گورننس کیتے روزانہ ادھا گھنٹہ وی نئی ݙیندی جݙانجو انتشار تے تخریب کاری نال متعلق امور تے چھی چھی گھنٹے اجلاس کیتے ویندن۔ انہاں سوال کیتا جو کیا خیبر پختونخوا دی عوام ایں طرزِ حکمرانی دے متحمل ہو سڳدن؟ عطا اللہ تارڑ آکھیا جو دہشت گردی دی وّی وجوہات اچ تحریکِ انصاف دی پالیسیاں تے نظریاتی سوچ دا کردار اے۔ انہاں آکھیا جو تحریکِ انصاف آپݨے دورِ حکومت اچ دہشت گرداں کوں ولا ڳھن آ تے آباد کیتا تے شہداء دے خون نال غداری کیتی کیونکہ انہاں دی نظریاتی ہم آہنگی کالعدم تحریکِ طالبان افغانستان (ٹی ٹی اے) تے کالعدم تحریکِ طالبان پاکستان (ٹی ٹی پی) دے نال اے۔ وفاقی وزیرِ اطلاعات بلوچستان دی مثال ݙیندے ہوئیں آکھیا جو وزیراعلیٰ میر سرفراز بگٹی صوبے دی ترقی تے کاؤنٹر ٹیررازم ڈیپارٹمنٹ (سی ٹی ڈی) کوں موثر بݨاوݨ کیتے ݙینھ رات کم کریندے پئن۔ بلوچستان دی پوری حکومت دہشت گردی دے خلاف سیسہ پلائی دیوار دی طرح کھڑی اے۔ اتھاں وزیراعلیٰ، وزراء، فوجی قیادت تے پولیس دہشت گردی دے خلاف ہک جامع حکمتِ عملی دے تحت کم کریندے پئن۔ انہاں آکھیا جو خیبر پختونخوا اچ افسران دی تعیناتیاں اچ میرٹ کوں نظر انداز کیتا ڳیا تے ایجھے افسران تعینات کیتے ڳئے جیڑھے مبینہ طور تے بھتہ خوری اچ معاونت کریندن۔ انہاں آکھیا جو وزیراعلیٰ سہیل آفریدی نہ دہشت گردی دے خلاف جنگ دی ذمہ داری قبول کرݨ کو تیار ہن تے نہ ہی ایں بارے سنجیدہ ہن۔ ایں دی وجہ دہشت گرداں دے نال نظریاتی ہم آہنگی اے جیندی قیمت صوبے دے عوام ادا کریندے پئن۔ ہک سوال دے جواب اچ عطا اللہ تارڑ آکھیا جو تحریکِ انصاف روزانہ توہینِ عدالت دی مرتکب تھیندی پئی اے۔ سڑکاں بند کرݨ، شہریاں دی زندگی اجیرن بݨاوݨ، انتشار پھیلاوݨ، جلاؤ گھیراؤ دی کال ݙیوݨ تے توڑ پھوڑ کرݨ ایں جماعت دی سیاست دا حصہ بݨ ڳئے۔ انہاں آکھیا جو تحریکِ انصاف دے کارکناں میٹرو سٹیشناں کوں ٻھاہ لاتی اتے اتھاں درخت جلائے۔ ایں جماعت دا ایجنڈا تباہی اے۔ مولانا فضل الرحمان دے حوالے نال ہک سوال دے جواب اچ وفاقی وزیرِ اطلاعات آکھیا جو او انہاں کوں قدر دی نگاہ نال ݙیکھدنا تے ہک سینئر سیاست دان ہن۔ انہاں امید اے جو مولانا فضل الرحمان دا کردار مثبت ہوسی۔ تاہم انہاں سوال چاتا جو خیبر پختونخوا دے عوام کوں آخر کݙاں تئیں ظلم تے دہشت گردی کوں فروغ ݙیوݨ آلے نظام دے رحم و کرم تے چھوڑ ݙتا ون٘ڄ سڳدے؟