وزیراعظم “دانش آئی ٹی پارک” دا افتتاح کر ݙتا، اے پارک مصنوعی ذہانت تے انفارمیشن ٹیکنالوجی دے شعبیاں اچ نوجواناں کوں ہنرمند بݨاوݨ، جدت دے فروغ اچ سنگِ میل ثابت تھیسی، شہباز شریف

اسلام آباد۔10 اکتوبر (اے پی پی) وزیراعظم محمد شہباز شریف اسلام آباد آئی ٹی پارک دا ناں ’’دانش آئی ٹی پارک‘‘ رکھݨ دا اعلان کریندیں ہوئیں آکھیا جو اے منصوبہ پاکستان اچ مصنوعی ذہانت (اے آئی) تے انفارمیشن ٹیکنالوجی دے شعبیاں اچ نوجواناں کوں ہنرمند بݨاوݨ، جدت دے فروغ تے ملک دی ترقی تے خوشحالی اچ سنگِ میل ثابت تھیسی۔ انہاں اے ڳالھیں اسلام آباد اچ نیشنل ٹیکنالوجی پارک دی افتتاحی تقریب نال خطاب کریندیں ہوئیں کیتا۔ تقریب اچ نائب وزیراعظم تے وزیرِ خارجہ سینیٹر محمد اسحاق ڈار، وفاقی وزیرِ آئی ٹی شزا فاطمہ خواجہ، وفاقی وزیرِ اطلاعات تے نشریات عطا تارڑ تے وفاقی وزیرِ منصوبہ بندی احسن اقبال سمیت وفاقی کابینہ دے ارکان، پارلیمنٹرینز، جنوبی کوریا دے سفیر، معروف آئی ٹی کمپنیاں دے سربراہان تے آئی ٹی ماہرین شرکت کیتی۔ تقریب نال خطاب کریندیں ہوئیں وزیراعظم آکھیا جو اے جدید آئی ٹی پارک انکیوبیشن سینٹرز، انوویشن، سٹارٹ اپس، چھوٹے تے درمیانے درجے دے کاروبار، صنعتوں تے نوجوان کاروباری افراد کیتے مواقع فراہم کریسی، ایں توں ملک دے ہزاراں نئی بلکہ لکھاں نوجوان مرد و خواتین کوں ہنر سکھݨ تے بااختیار بݨݨ دا موقع ملسی جݙانجو ایہو مہارتاں پاکستان کوں ترقی یافتہ ملکاں دی صف اچ شامل کرݨ اچ مدد ݙیسن۔ انہاں آکھیا جو جݙݨ اے آئی ٹی پارک مکمل طور تے فعال تھی ویسے تاں انہاں کوں یقین اے جو ایں طرز دے درجناں تے سینکڑاں نئی بلکہ ہزاراں آئی ٹی پارکس ملک دے چاریں صوبیاں اچ قائم تھیسن۔ مصنوعی ذہانت تے انفارمیشن ٹیکنالوجی دی مدد نال زراعت، صنعت، مینوفیکچرنگ، معدنیات تے ٻیاں شعبیاں اچ جدید علوم توں استفادہ کیتا ون٘ڄ سڳسی۔ وزیراعظم آکھیا جو اسلام آباد آئی ٹی پارک دے منصوبے دا سنگِ بنیاد 2017-18ء اچ رکھیا ڳیا ہا، تاہم ایں دے بعد کیا تھیا، او تاریخ دا حصہ اے۔ انہاں آکھیا جو اے سیاسی پوائنٹ سکورنگ دا موقع نئی بلکہ منصوبے دی تکمیل اچ تعاون کرݨ آلے تمام افراد دی کوشساں کوں سراہوݨ دا موقع اے۔ انہاں آکھیا جو حکومت دے متعلقہ وزرا بالخصوص وزیرِ خزانہ تے وزیرِ آئی ٹی تے سیکریٹری آئی ٹی سمیت انہاں دی پوری ٹیم منصوبے دی تکمیل کیتے محنت کیتی۔ سیکرٹری آئی ٹی طبیعت ناساز تھیوݨ پاروں تقریب اچ شریک نئی تھی سڳے، وزیراعظم انہاں دی صحت یابی کیتے نیک تمنائیاں دا اظہار کیتا۔ وزیراعظم آکھیا جو ابتدا اچ ایں منصوبے کوں ناقابلِ عمل منصوبہ قرار ݙتا ڳیا لیکن ٹیم ورک تے ݙینھ رات دی محنت نال ایں کوں ہک مستحکم تے قابلِ عمل منصوبے اچ تبدیل کر ݙتا ڳیا۔ انہاں آکھیا جو انہاں خود وی ایں منصوبے بارے کئی اجلاساں دی صدارت کیتی تے ہک توں ودھ واری اتھائیں آئے، کیونجو منصوبہ نہ صرف طویل تاخیر دا شکار ہا بلکہ او چاہندے ہن جو ملک دے نوجوان جلدی توں جلدی ایں توں فیدہ چاون اتے پاکستان ترقی دی ترقی تھیوے۔ تقریب اچ موجود جنوبی کوریا دے سفیر تے ٻیاں معزز مہماناں نال مخاطب تھیندے ہوئیں وزیراعظم جنوبی کوریا دے نال آپݨے دیرینہ تعلقات دا ذکر کیتا۔ وزیراعظم جنوبی کوریا دے صدر دا شکریہ ادا کریندیں ہوئیں آکھیا جو جنوبی کوریا دا ایں منصوبے اچ تعاون قابلِ قدر اے۔ انہاں یقین ݙوایا جو پاکستان ایں منصوبے دی ݙیکھ بھال کریسی اتے ایں کوں ایں شعبے اچ ہک کامیاب منصوبہ بݨایا ویسے۔ انہاں آکھیا جو آئی ٹی پارک دی اہمیت صرف عمارت یا تعمیراتی ڈھانچے تئیں محدود نئی بلکہ ایں دا اصل مقصد ایجھا نظام تشکیل ݙیوݨ اے جیندے اچ جدت، انکیوبیشن سینٹرز، ہنر دی ترقی، فنی تربیت تے کاروباری افراد کوں آئی ٹی تے مصنوعی ذہانت دے ماہرین توں سکھݨ دے مواقع ملن۔ اے مرکز انہاں تمام افراد کیتے مہارتاں دے فروغ اچ اہم کردار ادا کریسی جیڑھے سکھݨ تے عملی میدان اچ اگوں ودھݨ دے خواہشمند ہن۔ وزیراعظم ݙسایا جو انہاں متعلقہ وزارت کوں ہدایت کیتی اے جو عمارت کوں شفاف طریقۂ کار دے تحت چلاوݨ کیتے آئی ٹی تے مصنوعی ذہانت دے شعبیاں اچ کم کرݨ آلیاں ملکی تے غیر ملکی کمپنیاں کوں مدعو کیتا ون٘ڄے۔ انہاں اچوں بہترین خدمات فراہم کرݨ آلی کمپنی کوں موزوں ترین شرائط تے عمارت حوالے کیتی ویسے۔ انہاں آکھیا جو ایں انتظام دے تحت حکومتِ پاکستان دا روزمرہ آپریشنز نال کوئی تعلق نہ ہوسی، بلکہ ماہرین تے اساتذہ ایں مرکز کوں دنیا اچ رائج معروف طریقۂ کار دے مطابق چلیسن۔وزیراعظم ٻیا آکھیا جو دانش آئی ٹی پارک ملک دا پہلا ایجھا آئی ٹی پارک ہوسی جئیں کوں حکومتِ پاکستان ٻیاں صوبیاں دے علااو آزاد جموں تے کشمیر تے گلگت بلتستان تئیں وی وسعت ݙیسی۔