نائب وزیراعظم تے وزیرِ خارجہ سینیٹر محمد اسحاق ڈار دی پاکستان تے عمان دے مشترکہ وزارتی کمیشن دے اٹھویں اجلاس دی تیاریاں دا جائزہ گھنݨ کیتے بین الوزارتی اجلاس دی صدارت

اسلام آباد۔10 اکتوبر (اے پی پی) نائب وزیراعظم تے وزیرِ خارجہ سینیٹر محمد اسحاق ڈار پاکستان تے عمان دے مشترکہ وزارتی کمیشن (جے ایم سی) دے اٹھویں اجلاس دیاں تیاریاں دا جائزہ گھنݨ کیتے بین الوزارتی اجلاس دی صدارت کیتی، اجلاس اچ آئندہ مشترکہ وزارتی کمیشن دے ایجنڈے، ݙوپاسہ معاہدیاں تے انتظامات دا جائزہ گھدا ڳیا۔ ہفتے کوں دفترِ خارجہ توں جاری بیان دے مطابق پاکستان تے عمان دے مشترکہ وزارتی کمیشن (جے ایم سی) دے اٹھویں اجلاس دی مشترکہ صدارت نائب وزیراعظم تے وزیرِ خارجہ تے عمان دے وزیرِ خارجہ کریسن، جیندا مقصد پاکستان تے عمان وچال تعاون کوں ٻیا فروغ ݙیوݨ اے۔ مشترکہ وزارتی کمیشن اچ تجارت، سرماے کاری، صنعت، زراعت، مالیات، تیل و گیس، افرادی قوت، قونصلر امور، سکیورٹی، دفاع، موسمیاتی تبدیلی، شہری ہوا بازی، تعلیم، میڈیا تے ثقافت سمیت مختلف شعبیاں اچ تعاون کوں ٻیا مستحکم کرݨ تے توجہ ݙتی ویسے۔ نائب وزیراعظم و وزیرِ خارجہ ݙوپاسہ تعلقات دے استحکام اچ مشترکہ وزارتی کمیشن دی اہمیت تے زور ݙیندے ہوئیں تمام متعلقہ فریقین کوں ہدایت کیتی جو اجلاس دی جامع تیاریاں تے مؤثر فالو اپ کوں یقینی بݨایا ون٘ڄے تانجو ٹھوس نتائج حاصل کیتے ون٘ڄ سڳن۔ اجلاس اچ وزیراعظم دے معاونِ خصوصی طارق باجاو، اقتصادی امور، وزارتِ داخلہ تے وزارتِ بحری امور دے سیکریٹریز، عمان اچ پاکستان دے سفیر، وزارتِ خارجہ تے ٻیاں متعلقہ وزارتاں دے سینئر حکام شرکت کیتی۔