پاکستان کثیرالجہتی نظام تے علاقائی تعاون اچ فعال کردار ادا کریندا پئے، وزیرِ خزانہ محمد اورنگزیب

اسلام آباد۔14 اکتوبر (اے پی پی) وفاقی وزیرِ خزانہ و محصولات سینیٹر محمد اورنگزیب کثیرالجہتی نظام نال پاکستان دی وابستگی دا اعادہ کریندے آکھیے جو پاکستان علاقائی تعاون اچ فعال کردار ادا کریندا پئے تے مستقبل اچ وی اے کردار ادا کرݨ کیتے تیار اے۔ انہاں اے ڳالھ بنکاک اچ عالمی بینک گروپ تے آئی ایم ایف دے سالانہ اجلاساں دے موقع تے آئی ایم ایف دی منیجنگ ڈائریکٹر دے نال مشرقِ وسطیٰ، شمالی افریقہ، افغانستان تے پاکستان (میناپ) دے اجلاس اچ شرکت دے موقع تے آکھی۔انہاں پاکستان دی معاشی پیشرفت تے علاقائی چیلنجز تے ڳالھ کیتی ۔ وزیرِ خزانہ ݙسایا جو مالیاتی خسارہ 22 سال دی گھٹ ترین سطح تے آ ڳئے، مسلسل ترائے سال بنیادی مالیاتی سرپلس حاصل کیتا ڳئے تے معاشی شرحِ نمو 3.7 فیصد رہی اے۔ انہاں ݙسایا جو زرِ مبادلہ دے ذخیرے تاریخ دی بلند ترین سطح تے ہن جنہاں نال ترائے مہینیاں دیاں برآمدات پوریاں کیتیاں ونڄ سڳدن۔وزیرِ خزانہ موسمیاتی تے علاقائی دھچکیں نال نبڑݨ دی بہتر صلاحیت کوں وی اجاگر کیتا۔ انہاں خودمختار کریڈٹ ریٹنگ اچ بہتری، ستمبر اچ یورو بانڈ دے اجراء تے 7 اکتوبر کوں آئی ایم ایف دے نال سٹاف لیول معاہدے کوں معاشی پیشرفت دے شواہد قرار ݙتا۔وزیرِ خزانہ اصلاحات دا عمل جاری رکھݨ، گھٹ آمدݨ آلے طبقیں دے تحفظ تے سماجی ہم آہنگی برقرار رکھݨ کیتے ایجھی ہدفی تے محدود مدت دی سبسڈی ݙیوݨ دے عزم دا اعادہ کیتا جیندے نال بجٹ تے اضافی ٻوجھ نہ پووے۔ انہاں توانائی دے ذرائع تے تجارتی رستیں اچ تنوع، علاقائی انضمام کوں مزید گھاٹا کرݨ تے رسد و ترسیل دے نظام و غذائی نظام اچ سرمایہ کاری دی لوڑھ تے وی زورݙتا۔