وفاقی وزیرِ خزانہ محمد اورنگزیب دی کلائمیٹ ولنریبل فورم، وی 20 سیکرٹریٹ تے مورگن اسٹینلے کیپٹل دے نمائندیں نال ملاقاتاں

بنکاک۔16 اکتوبر (اے پی پی) وفاقی وزیرِ خزانہ و محصولات سینیٹر محمد اورنگزیب پاݨی، صحت تے تعلیم دے شعبیں اچ خودمختار سرمایہ کاری کوں راغب کرݨ، موسمیاتی مالی معاونت ودھاوݨ تے پاکستان دی سرمایہ منڈی اچ اصلاحات دے ذریعے غیر ملکی سرمایہ کاراں دی شرکت اچ ودھارے تے زور ݙتے۔انہاں اے ڳالھ بنکاک اچ عالمی بینک گروپ تے آئی ایم ایف دے سالانہ اجلاساں 2026ء دے موقع تے کلائمیٹ ولنریبل فورم (سی وی ایف) تے وی 20 سیکرٹریٹ دی منیجنگ ڈائریکٹر سارہ جین احمد تے مورگن اسٹینلے کیپٹل انٹرنیشنل دے نمائندیں نال انڄ انڄ ملاقاتاں اچ آکھئن۔ انہاں ملاقاتاں اچ گورنر سٹیٹ بینک آف پاکستان وی انہاں دے رلے ہن۔سارہ جین احمد نال ملاقات اچ پاکستان دے کلائمیٹ پراسپیرٹی پلان، رعایتی شرطاں تے مالی معاونت اچ ودھارے تے مجوزہ لائف لائن فنڈ تے ڳالھ مہاڑ کیتی ڳئی۔ وزیرِ خزانہ فنڈ دے قیام دی تجویز دی تعریف کریندے ایں دے مالیاتی ڈھانچے، نظم و نسق، وسائل تئیں رسائی، منافع تے رقم کڈھواوݨ دے طریقۂ کار متعلق وضاحت منڳی، مجوزہ منصوبے دے تحت لائف لائن فنڈ کوں اپریل 2027ء تئیں فعال کرݨ، ابتدائی طور تے 50 کروڑ ڈالر جمع کرݨ تے بعد اچ ایں دا حجم 2 ارب ڈالر توں تجاوز کرݨ دا ہدف رکھا ڳئے۔ ملاقات اچ مجوزہ کنٹری پلیٹ فارم، سرمایہ کاراں دی فہرست، برج اقدام تے چینی اداریں سودھے ترقیاتی شراکت داراں دے نال تعاون تے وی ڳالھ تھئی۔وزیرِ خزانہ ایں ڳالھ تے زور ݙتا جو متعلقہ وزارتاں انہاں اقدامات دی ملکیت تے ذمہ واری سنبھالن، انہاں کوں بجٹ اچ شامل کرن تے اقوامِ متحدہ دے ترقیاتی پروگرام سودھے ٻئے شراکت داراں دے نال رابطے تے ہم آہنگی کوں یقینی بݨاون تاں جو وسائل دے مؤثر استعمال دے نال کوششاں دی غیر ضروری تکرار توں بچیا ونڄ سڳے۔ایم ایس سی آئی دے نمائندیں نال ملاقات اچ پاکستان دی کیپٹل مارکیٹ اچ اصلاحات، بہتر تھیندے معاشی اشاریں تے سٹاک مارکیٹ اچ سرمایہ کاراں دی ودھدی شرکت تے ڳالھ مہاڑ کیتی ڳئی۔ وزیرِ خزانہ پاکستان دی کیپٹل مارکیٹ اچ پیشرفت اجاگر کریندے ابھردی ہوئی منڈی دا درجہ حاصل کرݨ دے امکانات متعلق امور تے ڳالھ کیتی۔ ملاقات اچ ایم ایس سی آئی دے درجہ بندی دے معیار تے غیر ملکی سرمایہ کاراں دے پاسے توں زرِ مبادلہ، پیشگی مالی انتظامات، مالیاتی خطرے توں بچݨ تے مشترکہ سرمایہ کاری متعلق چاتے ڳئے سوالاں دا جائزہ ڳھدا ڳئے۔ ایں موقع تے خصوصی کنورٹیبل روپیہ اکاؤنٹ دے تحت رقم دی واپسی دے انتظامات تے روشن ڈیجیٹل اکاؤنٹ تئیں رسائی اچ توسیع متعلق امور وی واضح کیتے ڳئے۔ شرکاء کیپٹل مارکیٹ تئیں رسائی بہتر بݨاوݨ تے عملی مسئلیں دے حل کیتے تکنیکی سطح تے مزید رابطیں تے پیشرفت دی حمایت کیتی۔