وفاقی وزیر موسمیاتی تبدیلی ڈاکٹر مصدق ملک دا پاک-جرمن گرین سٹارٹ اپس، پائیدار جدت تے تحقیق دے شعبیں اچ تعاون مزید ودھاوݨ تے زور

اسلام آباد۔16 اکتوبر(اے پی پی) وفاقی وزیرموسمیاتی تبدیلی ڈاکٹر مصدق ملک پاکستان تے جرمنی وچال گرین سٹارٹ اپس، پائیدار جدت تے تحقیق دے شعبیں اچ تعاون کوں مزید ودھاوݨ تے زور ݙیندے آکھیے جو موسمیاتی تبدیلیاں نال نبڑݨ کیتے مشترکہ اقدامات ݙوہیں ملکاں دے پراݨے تعلقات ٻئے اُتے ونڄ سڳدن۔جرمن اتحاد دے ݙینھ دی مناسبت نال منعقدہ تقریب نال خطاب کریندے وفاقی وزیر آکھیا جو پاکستان جرمنی دے جدت تے تحقیق دے نظام توں فیدہ چا تے ماحول دوست کاروبار دے ودھارے تے ایجھے پائیدار حل تیار کرݨ چاہندے جنہاں کوں عالمی سطح تے وی وسعت ݙتی ونڄ سڳے۔ انہاں آکھیا جو حکومت ملک اچ گرین سٹارٹ اپس دے ودھارے کیتے ہک نویں تجارتی تحریک شروع کرݨ چاہندی اے جیندے ذریعے جوان محققین تے جدت طراز لوک اپݨی ڳالھ کوں قابلِ عمل کاروبار اچ بدال سڳن۔ انہاں دا آکھݨ ہئی جو اساں سٹارٹ اپس دا انقلاب گھن آوݨ چاہندوں، ہر شئے ماحول دوست تے پائیدار ہووݨی چاہیدی اے۔ انہاں ایں امر تے زور ݙتا جو نوجواناں کوں محض مالی معاونت تے گرانٹس تے انحصار کرݨ دی بجائے اپݨے تحقیقی کم تے تخلیقی خیالات دی بنیاد تے کاروبار قائم کرݨ دے موقع ݙتے ونڄن۔ڈاکٹر مصدق ملک آکھیا جو پاکستان کوں چھل سودھے ٻہوں سارے سنگین ماحولیاتی چیلنجز دا سامݨا اے جئیں پاروں ایجھے اختراعی حل تیار کرݨا ناگزیر اے جیڑھے جو مقامی مسئلیں دے حل دے نال نال بین الاقوامی سطح تے وی قابلِ عمل ثابت ہوون۔ انہاں امید ظاہر کیتی جو جرمنی دے تحقیقی تے اختراعی اداریں دے نال تعاون پاکستان اچ گرین سٹارٹ اپس دے ہک مضبوط نظام دی تشکیل، جوان تجارتی لوکاں دی حوصلہ افزائی تے پائیدار ترقی دے ودھارے اچ معاون ثابت ہوسی۔پاکستان تے جرمنی دے اقتصادی تعلقات دا ذکر کریندے وفاقی وزیر جرمنی کوں پاکستان دے نیڑے شراکت داراں اچوں ہک تے ایں دا ساریں توں وݙا تجارتی شراکت دار قرار ݙتا۔ انہاں آکھیا جو پاکستان جی ایس پی پلس دی حیثیت برقرار رکھݨ کیتے درکار معیارات تے پورا لہݨ کیتے پرعزم اے۔ وفاقی وزیر دا آکھݨ ہئی جو پاکستان رعایتاں منڳݨ دی بجائے متعلقہ تقاضیں تے عملدرآمد دے ذریعے اپݨے عزم تے سنجیدگی کوں ثابت کرݨ چاہندے۔ انہاں ݙوہیں ملکاں وچال تجارت تے اقتصادی تعاون کوں مزید مستحکم کرݨ دی لوڑھ تے وی زور ݙتا۔جرمنی دے اتحاد دی تاریخی اہمیت تے روشنی پیندے ڈاکٹر مصدق ملک آکھیا جو جرمنی دے ݙوہیں حصیں دا ول متحد تھیوݨ عوامی عزم، محبت تے سانجھی یکجہتی دی طاقت دا مظہر اے۔ انہاں آکھیا جو کندھیاں کھڑیاں کیتیاں ونڄ سڳدن لیکن انہاں کوں ڈہایا تے بھنیا وی ونڄ سڳدے۔ انہاں دے بقول، محبت تے سانجھے اتحاد دی بنیاد تے قائم تھیوݨ آلے رشتے زیادہ پائیدار ہوندن۔ انہاں زبان، ثقافت تے مذہب دے اختلافات توں بالاتر تھی تے مشترکہ انسانی اقدار کوں تسلیم کرݨ دی اہمیت تے وی زور ݙتا۔وفاقی وزیر پاکستان تے جرمنی دے تاریخی و ثقافتی رابطیں دا ذکر کریندے علامہ محمد اقبال دی جرمنی نال وابستگی، ہائیڈل برگ اچ انہاں دے آوݨ تے جرمن شاعر گوئٹے دے ادب نال انہاں دی دلچسپی دا حوالہ ݙتا۔ انہاں علامہ اقبال دے ناں نال سڑک منسوب کرݨ تے جرمنی دا شکریہ وی ادا کیتا۔ انہاں جرمن نژاد ڈاکٹر روتھ فاؤ دیاں انسانی خدمات کوں وی خراجِ تحسین پیش کیتا جنہاں پاکستان اچ جذام دے مریضاں دے علاج تے متاثرہ لوکاں دی خدمت کیتے اپݨی زندگی وقف کر ݙتی۔ انہاں آکھیا جو ڈاکٹر روتھ فاؤ دی خدمات ݙوہیں ملکاں وچال انسانی ہمدردی تے خیرسگالی دے تکڑے رشتیں کوں ظاہر کریندن۔وزیراعظم دی طرفوں جرمنی کوں مبارخ ݙیندے ڈاکٹر مصدق ملک نے ملک دے پرامن اتحاد دی تعریف کیتی۔ انہاں آکھیا جو 15 اکتوبر پاکستان تے جرمنی دے سفارتی تعلقات دے قیام دی 75ویں سالگنڈھ دا موقع ہئی، جیڑھا جو ݙوہیں ملکاں وچال دوستی، انسانی ہمدردی تے پائیداری دے مشترکہ عزم دی تجدید دا ہک اہم موقع اے۔ وفاقی وزیر امید ظاہر کیتی جو تحقیق، جدت تے ماحول دوست کاروبار دے شعبیں اچ ݙوپاسے تعاون ودھا تے ݙوہیں ملک اپݨے تعلقات کوں مزید تکڑا بݨاوݨ تے پائیدار ترقی دے مشترکہ اہداف دے حصول اچ اہم پیشرفت کر سڳسن۔