عالمی برادری کشمیریاں کوں انہاں دا حق خودارادیت دیواونڑ کیتے کردارادا کرے،کشمیریاں دی کئیڈھاکیاں توں جدوجہد آزادی دا پھل ملنڑ دا ویلھا آگئے،وفاقی وزیر امور کشمیر وگلگت بلتستان علی امین گنڈا پوردا اے پی پی کوں انٹرویو

اسلام آباد ۔ 26 جولائی (اے پی پی) وفاقی وزیر امور کشمیر وگلگت بلتستان علی امین گنڈا پورآکھیے جو عالمی برادری کشمیریاں کوں انہاں دا بنیادی حق ڈیواونڑ کیتے کردارادا کرے، مودی دی فاشسٹ حکومت کشمیریاں کوں انہاں دے جماندرواتے اقوام متحدہ دے منیے ہوئے استصواب رائے دے حق نال طاقت دی تد تے محروم رکھیا ہوئے بھل کشمیریاں دی کئی ڈھاکیاں توں جدوجہد آزادی دا پھل ملنڑ دا ویلھا آگئے،اے گالھ انہاں اے پی پی کوں انٹرویو اچ آکھی۔ انہاں آکھیا جو بھارت دا کشمیر اچ ظلم ہر حد پار کرگئے جیکر عالمی برادری ایندے تے اج وی کردارادا نہ کیتا تاں ایندے خطے دے امن تے بہون ودھ سنگین نتائج نکلسن،5 اگست 2019ءدا ڈینھ کشمیر دی تریخ دا سیاہ ترین ڈینھ اے جڈاں بھارت کشمیریاں دی خصوصی حیثیت مکائی اے،معصوم کشمیریاں دا فوجی محاصرہ، تشدد، بدترین کرفیو اتے قت عام نال کشمیریوں دا جیونڑ بہوںاوکھا تھی گئے۔انہاں اے عزم وہرایا جو پاکستان کشمیریاں دی سیاسی، سفارتی اتے اخلاقی حمایت جاری رکھیسی، وزیر اعظم عمران خان کشمیریاں دے سفیر بنڑ تے سامنڑے ا ٓئن،ہنڑ کشمیر دا معاملہ جگ دے ہر فورم تے موثر انداز اچ چاتا ویسی،اج پورے جگ اچ کشمیر تے پاکستان اتے وزیراعظم عمران خان دی گالھ سنڑی ویندی اے،ہنڑ مقبوضہ کشمیر اچ انسانی حقوق دی پامالیاں تے بھارت کوں تھوہ تھوہ کیتا ویندا پئے اتے مودی دا فاشسٹ نظریہ بے نقاب تھی گئے جو کیویں او کشمیر اچ عالمی قوانین کوں لتڑیندے ہوئے مسلماناں دی نسل کشی اچ ردھے ہوئن۔انہاں چتائے کو کشمیری اگیں کڈاھیں بھارت دے اگو جھکین نہ ہی جھکسن،ہنڑ کشمیریاں کوں انہاں دا حق خود ارادیت دتے بغیر کوئی راہ کائنی،پاکستان وی کڈاھیں کشمیریاں دی جدوجہد آزادی دی حمایت توں پچھو نہ ہٹسی۔