اسلام آباد ۔ 4 اگست (اے پی پی)سرائیکی عوامی تریمت تحریک دی جنرل سیکرٹری سعدیہ لاشاری یوم استحصال دے موقعے تے آکھئے جوکشمیر جنت نظیر وادی ہمیشہ توں ای بھارت دے استحصال دا شکاررہی اے۔او مکڑی وانکنڑ ایں وادی دے گرد ہمیشہ ای جالے بنڑیندا ریہے جوکہیں وی طریقے نال او ایندے تے قابض رہ سکے ایندے کیتے اوں ہر حربہ استعمال کیتا،کرفیو لائے ،پابندیاں لائیاں ، خون دیاں ہولیاں کھیڈیاں ۔سہاگ اجاڑے۔ماواں دیاں جھولیاں اجاڑڈتیاں ،دھیاں دیاں عصمتاں تار تار کیتیاں ، ساری وادی اچ کلسٹر بم استعمال کیتے پر او کڈاہیں آپدے ارادے اچ کامیاب نہ تھی سگے۔پہلے شہید توں گھن تے برہان وانی اتے اج دے شہیداں تئیں ہر کشمیری سیسہ پلائی دیوار بنڑ تے اوندے ناپاک ارادیاں دے اگوں کھڑا رہیاں۔بھارت چنگی طرح جانڑدا ہا جو کشمیر دی ہر ماں ہر دھی ہر پتر اتے بال بال کشمیر تے قربان تھیونڑ تے ہر دم تیار اے پر انڈیا دیاں آپدیاں شرمناک حرکتاں تے کڈاہیں وی شرمندہ نی تھیا تے نہ ہی باز آئے۔انہاں آکھیے جو اگست 1947 پاکستان اتے بھارت وجود اچ آئے پر راجہ ہری سنگھ کہیں ملک دے نال ریاست دا الحاق نہ کیتا جڈاں جوڈوہیں ملکاں کوں معاہدہ قائم کرنڑ دی پیشکش کیتی جیندے تے پاکستان راجہ ہری سنگھ دی بجائے کشمیری عوام نال آپدا تعلق سمجھدا ہئی۔ کشمیر دی مسلم اکثریت آزادی دے فارمولے دے تحت پاکستان دا حصہ ہئی۔ جڈاں جو بھارت بدنیتی دی بنیاد راجہ ہری سنگھ دی پیشکش تے ٹال مٹول کیتی۔ راجہ ہری سنگھ پہلے تاں خومختیار رہونڑ دا فیصلہ کیتا پر بھارت کشمیر اچ آپدیاں فوجاں لہا ڈتیاں۔ اوندے تےراجہ بھارت توں ریاست کیتے انج آئین دا مطالبہ کیتا۔سنہ ۱۹۵۱ اچ اتھاں ریاستی آئین ساز اسمبلی دے قیام دی وی اجازت ڈے ڈتی۔اوں آئین دے تحت انڈیا دے آئین دیاں جو دفعات ڈوجھیاں ریاستاں تے لاگوہوندن انھاں دا اطلاق ریاست جموں کشمیر تے نہ تھیونڑاں ہا۔ انڈیا دے آئین اچ جموں تے کشمیر دی خصوصی شہریت دے حق توں متعلق دفعہ اے ۳۵ دے قانون دے تحت کشمیر دی حدود توں باہر دا کوئی شہری ریاست اچ غیر منقولہ جائیداد دا مالک نی بنڑسگدا۔کوئی وی باہر دا شہری کشمیراچ سرکاری نوکری نی کرسگدا ,نہ ہی کہیں قسم دی سرمایہ کاری دی اجازت اے۔نمبر ۲۔آرٹیکل ۳۷۰ دی رو نال انڈین حکومت مالیاتی ایمرجنسی نافذ نی کر سگدی۔آئین دے تحت ریاست کوں آپدا انج جھنڈا رکھنڑ دا وی حق ہا۔اے قوانین ڈوگرا مہاراجہ ہری سنگھ سنہ ۱۹۲۷ توں ۱۹۳۲ دے درمیان مرتب کیتے اتے ول سنہ ۱۹۵۴ اچ ہک صدارتی حکم نامہ دے ذریعے انڈیا دے آئین دا حصہ بنڑا ڈتا گیا۔ایندے نال ای اے وی جو انڈیا دے صدر دے کنیں ریاست دا آئین معطل کرنڑ دا کوئی حق حاصل نہ ہاپچھلے سال ۵اگست ۲۰۱۹ کوں بالآخر بھارت آپدی جارحیت ڈکھیندے ہوئے جموں تے کشمیر کوں اوندی خصوصی حیثیت ڈیونڑ آلے آرٹیکل ۳۷۰ دا خاتمہ کر ڈتاگیا اوندے نال ای صدارتی حکم نامہ توں لاگو کیتا گیا آرٹیکل ۳۵ اے وی مکا ڈتا گیا جیندی وجہ توں جموں تےکشمیر دا آپدا ہک سرخ جھنڈا ہا جیڑھا سرکاری عمارتاں اتے گاڈیاں اتے لاونڑاں آئین دا حصہ ہا۔آرٹیکل اے ۳۵ دی رو نال ریاست باشندے دی بطور مستقل باشندہ دی حیثیت وی مک گئی،ریاست کوں ڈوں ٹریٹری جموں کشمیر اتےلداخ اچ ونڈڈتا گیا۔ اے سب انتہائی چالاکی اتے بھرپور منصوبہ بندی نال کشمیری قوم دے نال دغا کیتاگیا پچھلے کچھ عرصے توں کشمیر اچ غیر معمولی سرگرمیاں جاری ہن۔ ۲۰ ہزار بھارتی فوجیاں دی آمد کشمیری رہنماواں دی نظر بندی اتے مواصلاتی پابندی دراصل کشمیریاں دے وڈے ردعمل کوں روکنڑاں تے انھاں کوں کلھا کرنڑاں ہئی۔ ۵ اگست ۲۰۱۹ بھارتی راجیا سبھا اچ انڈیا دی حکومت ولوں آرٹیکل ۳۷۰ کوں مکاونڑاں انتہائی غیر قانونی اتے غیر آئینی اےبھارت دی ایں جارحیت تے بہوں کجھ آکھیا تے لکھیا گئے ملکی اتے غیر ملکی اخباربھرے پئین۔اتھاں تئیں جواسلامی ملکاں دی او آئی سی وی ایکوں غیر آئینی قرار ڈتااے۔ اقوامِ متحدہ دے سیکریٹری جنرل کشمیردے اسٹیٹس کوں برقرار رکھنڑدی گالھ کیتی جنیوا دے اقوامِ متحدہ دے انسانی حقوق دے ادارے وی کشمیر دی موجودہ صورتحال تےتشوئش دا اظہار کیتا اے۔پاکستان ہمیشہ وانکنڑ کشمیرنال کھڑا اے۔مسئلہ کشمیر تے پاکستان ہمیشہ آپدا کردار سوہنڑے طریقے نال نبھایا اے۔اج پاکستان سمیت پوری دنیا اچ مقیم کشمیری ۵ اگست کوں یوم استحصال دے طور تے منیدے پئین۔ اج ہک کروڑکشمیر ی عالمی برادری اتےعالمی ضمیر توں سوال کریندے پئین۔۔۔؟کیا انساناں دی اتی وڈی تعداد کوں ہک سال تئیں لاک ڈاو ¿ن سچ رکھ تے انھاں تے پابندی لائی ویندی اے۔ بھارت اقوام متحدہ اتے سلامتی کونسل اچ عالمی برداری دے سامنڑے اے طے کرچکیااے جو کشمیریاں کوں استصوابِ رائے دا حق ڈیسی۔ عالمی برادری، اقوام متحدہ اتے سلامتی کونسل کشمیریاں کوں انھاں داحق کڈنڑ ڈیویسی۔
