اسلام آباد۔30 جون(اے پی پی)وزیراعظم عمران خان بجٹ دی منظوری تے اطمینان کریندے آکھیے جو نواں بجٹ میݙے ویژن دے مطابق ٻݨایا ڳئے، خوشی اے جو اقتصادی ٹیم دیاں کوششاں نال معاشی صورتحال چنڳی تھی ڳئی اے، ملک دے انتخابی نظام کوں شفاف ٻݨاوݨ دا ویلھا آڳئے کیوں جو اے کہیں ہک سیاسی جماعت دا نئیں ملک دے جمہوری مستقبل دا سوال اے، انتخابی اصلاحات اتے الیکٹرونک ووٹنگ مشیناں تے جیکر اپوزیشن مثبت تجاویز ݙیوے تاں اوندے نال مل ٻیھ تے الاوݨ کوں تیار ہیں جو انتخابی نتائج ہر کہیں کیتے قابل قبول ہوون اتے کہیں کوں وی دھاندلی نال ہرݨ دا ݙر نہ ہووے، جیکر اصلاحات نہ کریسوں تاں اے انتخابات ہمیشہ متنازعہ راہسن۔وزیراعظم عمران خان آکھیے جو ساکوں مجبوراً آئی ایم ایف دو ونڄݨا پئے، ساݙی ٹیم اوکھے فیصلے کیتن، چیلنجز دا سامݨا کیتے جیں پاروں کرونا دے باوجود معیشت کوں تکڑا کرݨ اچ کامیابی ملدی پئی اے، ملک کوں اسلامی فلاحی ریاست ٻݨاوݨ کیتے قائد دے نظریہ تے چلݨا ہوسی نتاں قیام پاکستان دا مقصد پورا نئیں تھیوݨا۔او قومی اسمبلی نال خطاب کریندے پئے ہن۔ وزیر اعظم آکھیا جو اساں خوش قسمت قوم ہیں جو ہمسایہ ملکاں دے مقابلے اچ کرونا توں ودھ متاثر نسے تھئے اللہ دا شکر اے جو اوں بچا ڳھدے۔
