اپوزیشن لانگ مارچ دے ناں تے ہلکان تھیندی پئی اے، پیپلز پارٹی دے لانگ مارچ دا کوں کوئی پچھݨ آلا نی، پٹرول، ڈیزل اتے بجلی دے نرخاں اچ گھٹکی نال صنعتاں کوں فروغ ملسی، روزگار دے موقع پیدا تھیسن، وفاقی وزیر اطلاعات تے نشریات چوہدری فواد حسین دی میڈیا نال ڳالھ مہاڑ

لاہور۔1مارچ (اے پی پی) وفاقی وزیر اطلاعات تے نشریات چوہدری فواد حسین آکھیا جو اپوزیشن لانگ مارچ دے ناں تے ہلکان تھیندی پئی اے، پیپلز پارٹی دے لانگ مارچ دا کوں کوئی پچھݨ آلا نی، پٹرول، ڈیزل اتے بجلی دے نرخاں اچ گھٹکی نال صنعتاں کوں فروغ ملسی، روزگار دے موقع پیدا تھیسن، بلاول کݙاہیں سیاست نی کیتی، انہاں کوں چیزاں دا اندازہ نی، مریم نواز کل زرداری صاحب کوں جو آکھے او انہاں دے دل دی آواز اے، آپݨے اتحادیاں نال رابطے اچ ہیسے، تحریک انصاف سیاسی جماعت اے، لوکاں کوں اوکھ اچ نی چھوڑ سڳدے، تحریک انصاف کوں ورثے اچ تباہ حال معیشت ملی اے، حکومت معیشت کوں سدھے پاسے ٹور ݙتے۔ اے ڳالھیں انہاں منگل کوں گورنر ہاؤس لاہور اچ میڈیا نال ڳالھ مہاڑ کریندیں ہوئیں آکھی۔ وفاقی وزیر اطلاعات آکھیا جو تحریک انصاف کوں ورثے اچ تباہ حال معیشت ملی جئیں پاروں ٻاہرلے قرضے ودھدے پئے ہن۔ حکومت دی پہلی کوشش ملک کوں دیوالیہ تھیوݨ توں بچاوݨ ہئی۔ انہاں آکھیا جو پاکستان کورونا وائرس دا بہترین حکمت عملی نال مقابلہ کیتے، عالمی ادارے ایں بارے پاکستان دی کوششاں دی تعریف کریندے پئے۔ وفاقی وزیر اطلاعات آکھیا جو عالمی سطح تے پٹرولیم مصنوعات دے نرخ ودھین جئیں پاروں اساکوں وی نرخ ودھاوݨے پئن، وزیراعظم پٹرول، ڈیزل اتے بجلی دے نرخ اچ وݙی ڳھٹکی دا اعلان کیتے۔ وزیراعظم کوں عوام دی تکلیفاں دا احساس اے، عام آدمی کوں ریلیف ݙیوݨ بارے کوشش کریندے پیوں۔