اسلام آباد۔10مارچ (اے پی پی):وزیرِ خارجہ مخدوم شاہ محمود قریشی آکھیے جو انسانی وقار کوں یقینی، تریمتاں کوں بااختیار بݨاوݨ، اقلیتاں دے حقوق دا تحفظ کرݨ تے بین المذاہب ہم آہنگی کوں ودھارا ݙیوݨ ساݙی حکومتی پالیسی دا حصہ اے ۔انہاں اے ڳالھ اقوام متحدہ دی ہائی کمشنرانسانی حقوق مشیل بیچلیٹ نال گالھ مہاڑ کریندے ہوئیں آکھی اے جنہاں خمیس کوں وزارتِ خارجہ اچ انہاں نال ملاقات کیتی۔دفتر خارجہ موجب وزیر خارجہ انسانی حقوق، بنیادی آزادیاں دے ودھارے تے تحفظ کیتے پاکستان دے عزم دا اعادہ کیتے مذہب یا عقیدے دی آزادی دے فروغ، حق خود ارادیت، غلط معلومات دا مقابلہ کرݨ تے اسلامو فوبیا بارے شعور اجاگر کرݨ دے حوالے نال پاکستان دے کردار تے روشنی پاتی ۔وزیر خارجہ واضح کیتے انسانی وقار کوں یقینی بݨاوݨ ، خواتین کوں بااختیار بݨاوݨ تے تحفظ ݙیوݨ ، ٻالاں دے حقوق کوں اڳوں ودھاوݨ ، اقلیتاں دے حقوق دا تحفظ کرݨ تے بین المذاہب ہم آہنگی کوں فروغ ݙیوݨ ساݙی حکومتی پالیسی دا حصہ ہن۔وزیر خارجہ تے ہائی کمشنر بیچلیٹ افغانستان اچ انسانی صورتحال تے وی تبادلہ خیال کیتا۔شاہ محمود قریشی آکھیے جو افغانستان دے عوام کوں انسانی بحران اتے اقتصادی تباہی توں بچاوݨ کیتے بین الاقوامی معاونت دی لوڑھ اے ۔
