صحت مند جیوݨ اپناوݨ نال ذیابیطس تے قابو پاوݨ اچ مدد مل سڳدی اے، صدر مملکت ڈاکٹر عارف علوی

اسلام آباد۔15نومبر(اے پی پی)صدر مملکت ڈاکٹر عارف علوی ذیابیطس بارے لوکاں کوں آگاہی ݙیوݨ تے زور ݙیندے آکھیے جو ہک صحت مند اتے تعلیم یافتہ قوم ہی ترقی کرسڳدی اے، باقاعدگی نال ورزش، وزن تے قابو پاوݨ، ودھ کھاوݨ توں پرہیز سودھا صحت مند طرز زندگی اپناوݨ نال ذیابیطس تے قابو پاوݨ اچ مدد ملسی جو اے ہک خاموش قاتل اے، ایندا ٻھار ڳھٹاوݨ کیتے بیماری دی تشخیص اتے ایندا مناسب انتظام ضروری اے، چین اتے بھارت دے بعد ڄڳ دی تریڄھی وݙی آبادی ذیابیطس دے مریضاں دی اے۔ اے ڳالھ صدر مملکت ایوان صدر اچ ذیابیطس دے عالمی ݙینھ سانڳے تقریب نال خطاب کریندے آکھی۔ تقریب اچ پاکستان اچ ڈنمارک دے سفیر جیکب لنلف، ہیلتھ سروسز اکیڈمی دے وائس چانسلر ڈاکٹر شہزاد علی خان، ماہرین صحت اتے ٻئے شخصیات شرکت کیتی۔ صدر مملکت ملک اچ ذیابیطس دے ودھدے ہوئے مرض تے چنتا کریندے آکھیے جو پاکستان ذیابیطس کھنݙݨ دے لحاظ نال ڄڳ دا تریڄھا وݙا ملک اے جتھاں 3 کروڑ 30 لکھ توں ودھ ذیابیطس دے مریض ہین، ملک اچ ہر سال چار لکھ لوک ذیابیطس اتے بیماری دے ٻئے مسلیاں پاروں مر ویندن۔ صدر مملکت ذیابیطس تے قابو پاوݨ کیتے روایتی اتے سوشل میڈیا دے ذریعے موثر، بامقصد اتے مسلسل آگاہی مہم شروع کرݨ تے زور ݙتے جو سمپوزیم، ورکشاپس، کانفرنسز اتے عوامی میٹنگز سودھا انفارمیشن ٹیکنالوجی کوں استعمال کریندے واٹس ایپ چیٹ بوٹس، ویب اتے سیل فون تے مبنی ایپلی کیشنز دے علاوہ کال اتے ٹیکسٹ پیغامات نال آگاہی ݙتی ونڄے۔