سعودی ولی عہد دی پاکستان اچ سرمایہ کاری 10 ارب ڈالر ودھاوݨ تے سٹیٹ بینک اچ ڈیپازٹ رکھی ڳئی رقم کوں 5ارب ڈالر تئیں ودھاوݨ تے غور کرݨ دی ہدایت

یاض ۔10جنوری(اے پی پی) سعودی عرب دے ولی عہد اتے وزیراعظم شہزادہ محمد بن سلمان پاکستان اچ سعودی عرب دی سرمایہ کاری 10 ارب ڈالر تئیں ودھاوݨ تے سٹیٹ بینک اچ بطور ڈیپازٹ رکھی ڳئی رقم کوں5ارب ڈالر تئیں ودھاوݨ کیتے جائزہ گھنݨ دی ہدایت کیتی اے ۔ سعودی پریس ایجنسی دی رپورٹ موجب شہزادہ محمد بن سلمان سٹیٹ بینک آف پاکستان اچ سعودی عرب دی طرفوں بطور ڈیپازٹ رکھی ڳئی رقم کوں وی 5ارب ڈالر ودھاوݨ تے غور کرݨ دی ہدایت کیتی اے ۔سعودی فرمانروا شاہ سلمان بن عبدالعزیز گزریل سال 25 اگست کوں پاکستان اچ ھک ارب ڈالر دی سرمایہ کاری دا حکم ݙتا ہئی ۔ شہزادہ محمد سلمان ایں سرمایہ کاری کوں ودھاوݨ کیتے جائزے دی ہدایت کیتی اے ۔ گزریل سال2دسمبر کوں سعودی عرب پاکستان دے مرکزی بینک اچ رکھیے ڳئے 3 ارب ڈالر دی مدت اچ مزید ھک سال دا ودھارا کرݙتا ہئی ۔ سٹیٹ بینک آف پاکستان نومبر 2021 اچ سعودی ڈیویلپمنٹ فنڈ نال ھک معاہدے تے دستخط کیتے ہن ، جیں دے تحت سعودی فنڈ 3ارب ڈالر سٹیٹ بینک اچ رکھیے ہن ۔ سعودی خبر رساں ادارے موجب سرمایہ کاری اچ ودھارے متعلق جائزے دا اے اعلان ولی عہد شہزادہ محمد بن سلمان اتے وزیر اعظم شہباز شریف دے درمیان رابطے دے تناظر اچ کیتا ڳئے ۔ شہزادہ محمد بن سلمان پاکستان اچ سعودی سرمایہ کاری وی 10 ارب ڈالر تئیں ودھاوݨ کیتے جائزہ گھنݨ دی ہدایت کیتی اے ۔