وزیراعظم محمد شہباز شریف نال پاکستان بزنس کونسل متحدہ عرب امارات دے وفد دی ملاقات ،یو اے ای دا دورہ ݙو پاسے یاری کوں سٹریٹجک پارٹنرشپ اچ بدلݨ اچ مدد ݙیسی، وزیراعظم

ابوظہبی۔13جنوری(اے پی پی) وزیراعظم محمد شہباز شریف آکھیے انہاں دا متحدہ عرب امارات دا دورہ ݙو پاسے یاری کوں سٹریٹجک پارٹنرشپ اچ بدلݨ اچ معاون ثابت تھیسی۔ پاکستان بزنس کونسل متحدہ عرب امارات دے وفد نال ملاقات اچ ڳالھ مہاڑ کریندے ہوئیں وزیراعظم آکھیے انہاں کوں اے ڄاݨ تے خوشی تھئی اے جو پاکستانی بزنس مین اپݨی محنت اتے تجربے کوں بروے کار گھن آندے ہوئیں متحدہ عرب امارات اچ آپݨا تے پاکستان دا ناں روشن کریندے پئن ۔ وزیراعظم آکھیے متحدہ عرب امارات دی قیادت نال انہاں دیاں ملاقاتاں کامیاب رہیاں،انہاں دا دورہ پاکستان اتے متحدہ عرب امارات دی یاری کوں اسٹریٹجک پارٹنرشپ اچ بدلݨ اچ مدد ݙیسی ۔ انہاں آکھیے جو جنیوا کانفرنس اچ عالمی برادری توقع توں ودھ تے اعلانات کیتے۔وزیراعظم پاکستان بزنس کونسل متحدہ عرب امارات دے وفد کوں پاکستان اچ کاروبار اتے سرمایہ کاری دی ترغیب ݙیندے ہوئیں آکھیے جو پاکستان اچ توانائی ، رئیل اسٹیٹ،انفارمیشن ٹیکنالوجی ،متبادل توانائی، فوڈ پراسیسنگ ، سیاحت اتے ٻئے شعبیں اچ سرمایہ کاری دے ٻہوں سارے موقع موجود ہن تے حکومت سرمایہ کاراں اتے بزنس مین کوں ساریاں سہولتاں ݙیوݨ کیتے بھرپور اقدامات کریندی پئی اے ۔وزیراعظم وفد کوں پاکستان اچ سرمایہ کاری دے حوالے نال تجاویز دے نال پاکستان آوݨ دی دعوت وی ݙتی ۔وفد حکومتی معاشی پالیسیز تے اطمینان دا اظہار کریندے ہوئیں پاکستان اچ کاروبار اتے سرمایہ کاری اچ دلچسپی ݙکھائی ۔ ملاقات اچ وفاقی وزیر خزانہ و محصولات اسحاق ڈار،وفاقی وزیر تجارت سید نوید قمر، وفاقی وزیر دفاع خواجہ آصف اتے سرکاری افسران شرکت کیتی۔