اسلام آباد۔19جنوری(اے پی پی) دفتر خارجہ دی ترجمان ممتاز زہرا بلوچ بھارت دے غیر قانونی زیر تسلط جموں و کشمیراچ انسانی حقوق دی سنگین پامالیاں تے گہری تشویش دا اظہار کریندے ہوئیں آکھیےپاکستان بھارت دے غیر قانونی زیرتسلط جموں و کشمیر اچ انسانی حقوق دی مسلسل سنگین خلاف ورزیاں تے آواز چیندا رہسی۔ خمیس کوں اتھاں ہفتہ وار پریس بریفنگ اچ انہاں آکھیے بھارت دے غیر قانونی زیر تسلط جموں و کشمیر اچ بھارتی افواج دی طرفوں ظلم و ستم جاری اے۔ انہاں آکھیے بھارتی قابض افواج ݙو کشمیری نوجواناں کوں ضلع بڈگام اچ ھک نقلی مقابلے اچ ڳاݙی توں لہا تے گولی مارتے شہید کرݙتے جݙاں جو ھک 75 سالہ زیر حراست قیدی محمد مقبول خان دی کپواڑہ جیل اچ تشدد پاروں موت واقع تھی ڳئی ۔ ترجمان آکھیے انہاں کوں تے انہاں تے ترائے پتراں کوں گزریل سال اگست اچ فرضی الزامات دے تحت حراست اچ ڳھدا ڳیا ہئی ، کپواڑہ دے کنن گائوں اچ ھک خاندان گزریل ھک مہینے توں آپݨے پتر تے بھرا عبدالرشید ڈار دی ڳول وچ ہے جیں کوں بھارتی فوج دی راشٹریہ رائفلز دے اہلکاراں 15 دسمبر کوں گرفتار کیتا ہئی ۔ ترجمان آکھیے جو گزریل ترائے ݙھاکیں توں بھارت دے غیر قانونی زیر تسلط جموں و کشمیر اچ سینکڑاں لوک بھارتی سکیورٹی فورسز دی تحویل اچ لاپتہ تھی چکن ۔ انہاں آکھیے معتبر اعداد و شمار موجب 1989 توں ہݨ تئیں مقبوضہ علاقہ اچ تقریباً اٹھ ہزارلوک لاپتہ تھی چکن ، پاکستان بھارت دے غیر قانونی زیر تسلط جموں و کشمیر اچ انسانی حقوق دی مسلسل سنگین خلاف ورزیاں تے آواز چیندا رہسی ۔ دفتر خارجہ دی ترجمان آکھیے پاکستان اقوام متحدہ دی سلامتی کونسل دی متعلقہ قرارداداں دے مطابق حق خود ارادیت گھنݨ کیتے جموں و کشمیر دے عوام دی اخلاقی، سیاسی اتے سفارتی حمایت جاری رکھیسی ۔ ترجمان آکھیے وزیر خارجہ بلاول بھٹو زرداری عالمی اقتصادی فورم دے اجلاس اچ شرکت کیتے ڈیووس وچ ہن ، وزیر خارجہ بلاول بھٹو زرداری دی کانگو دے صدر اتے ٻئے ملکاں دے رہنماواں نال ملاقات تھئی ۔ ترجمان آکھیے فورم دے موقع تے وزیر خارجہ بلاول بھٹو زرداری جمہوریہ کانگو دے صدر توں علاوہ چین دے نائب وزیر اعظم لیو ہی دے علاوہ سپین، سعودی عرب، بیلجیم، فن لینڈ اتے ہالینڈ دے وزرائے خارجہ نال ملاقاتاں کیتیاں ، انہاں ملاقاتاں اچ سانجھی دلچسپی دے ݙو طرفہ اتے عالمی امور تے ڳالھ مہاڑ کیتی ۔ ترجمان آکھیے وزیر خارجہ کارپوریٹ ایگزیکٹوز، بین الاقوامی اداریں دے سربراہواں ، میڈیا تے سول سوسائٹی دی سرکردہ شخصیات نال وی ڳالھ مہاڑ کیتی ۔
