اسلام آباد۔19جنوری(اے پی پی) وفاقی وزیر منصوبہ بندی و ترقی پروفیسر احسن اقبال آکھیے جو وزارت منصوبہ بندی اچ عالمی امداد توں بھرپور فیدہ چاوݨ کیتے خصوصی پراجیکٹ سیل بݨایا ویندا پئے۔ اے ڳالھ انہاں خمیس کوں اتھاں جنیوا کانفرنس دے فیصلیں تے عمل درآمد دا جائزہ گھنݨ کیتے منعقدہ اجلاس دی صدارت کریندے ہوئیں آکھی ۔ وفاقی وزیر آکھیے جنیوا کانفرنس اچ عالمی امداد 10.9 ارب ڈالر تے پڄ ڳئی اے تے پاکستان دی نویں سروں تعمیر دی حکمت عملی کوں عالمی سطح تے پذیرائی ملی اے۔ احسن اقبال آکھیے عالمی امداد توں بھرپور فیدہ چاوݨ کیتے خصوصی پراجیکٹس سیل وزارت منصوبہ بندی اچ بݨایا ویسی ۔ سپیشل پروجیکٹس یونٹ بہترین پروفیشنلز اتے ماہرین تے مشتمل ہوسی۔ انہاں آکھیے عالمی امداد دےمنصوبیں اچ شفافیت کوں یقینی بݨاوݨ کیتے تھرڈ پارٹی آڈٹ یقینی بݨایا ویسی ۔ وفاقی وزیر مزید آکھیے صوبیں تے وفاقی وزارتاں نال رل تے عوامی ضرورت دے پروجیکٹس دی تیاری دا فی الفور آغاز کیتا ویسی ۔
