اسمبلیاں تروڑݨ دا کوئی جواز کائنا ہا، انتخابات دی تاریخ الیکشن کمیشن ہی ݙے سڳدے، وفاقی وزیر ریلوے و رہنما مسلم لیگ ن خواجہ سعد رفیق

لاہور۔23جنوری(اے پی پی)وفاقی وزیر ریلوے و رہنما مسلم لیگ ن خواجہ سعد رفیق آکھیے جو اسمبلیاں تروڑݨ دا کوئی جواز کائنا ہا، اسمبلیاں تروڑ تے اختیارات دا بے جا اتے ناجائز استعمال کیتا گئے۔ احتساب عدالت دے ٻاھرو میڈیا نال ڳالھ مہاڑ کریندے ہوئے انہاں آکھیا جو میں ایں ویلھے الیکشن کراوݨ دے حق اچ کائنی، انتخابات دی تاریخ تاں الیکشن کمیشن ہی ݙسا سڳدے، الیکشن کراوݨ یا الیکشن الیکشن کھیݙݨ مسئلے دا حل نئیں، الیکشن کیتے ہر کہیں کوں متفق تھیوݨ ضروری اے۔ انہاں آکھیا جو لوک ٻکھے مردے پن اتے ساکوں آئی ایم ایف کوں ولا سݙݨا پئے ڳئے۔ خواجہ سعد رفیق آکھیا جو اسمبلیاں کوئی تماشا نئیں جو پہلے استعفے ݙیوو ول چا ڳھنو، استعفے ݙیوݨ آلیاں کوں الیکشن لڑݨ دا کوئی حق کائنی، جیڑھے سہولت کار وی عمران خان کوں ڳھن آئے ہن انہاں توں اللہ پچھسی جئیں ملک د اے حال کر تے ساݙے ڳل پاݙتے۔