اسلام آباد۔24جنوری(اے پی پی)وفاقی کابینہ بجلی دے تعطل جھیں واقعات روکݨ کیتے جامع حکمت عملی ٻݨاوݨ دی ہدایت کریندے توانائی دی بچت سانڳے پہلی نویکلی ملک گیر عوامی آگہی مہم شروع کرݨ دی منظوری ݙتی اے، ایں سانڳے توانائی دی بچت ریت اپناوݨ سانڳے عام اتے عالمی مروجہ طریقیاں کوں تعلیمی نصاب اچ شامل کیتا ویسی، اے مہم نجی و سرکاری اداریاں دے ڳانݙھے نال چلائی ویسی جیندے کیتے پرنٹ، الیکٹرانک، آئوٹ ڈور، سوشل میڈیا اتے رائے عامہ ماھرین دی مدد ڳھدی ویسی۔اے فیصلہ وزیراعظم شہباز شریف دی اڳواݨی اچ تھیوݨ آلے وفاقی کابینہ دے اجلاس اچ کیتا ڳئے۔ اجلاس اچ وفاقی وزیر توانائی خرم دستگیر بجلی دے وݙے بریک ݙائون دی وجوہات اتے ایندی بحالی کتیے اقدامات تے تفصیلی بریفنگ ݙتی ڄݙاں جو وفاقی وزیر اطلاعات و نشریات مریم اورنگزین توانائی دی بچت سانڳے رائے عامہ سروے دی سفارشات موجب قومی آگاہی مہم شروع کرݨ دے معامل تے بریفنگ ݙتی۔ ایں مہم اچ لوکاں دے توانائی دی بچت بارے رحجانات، عادات، جیوݨ دے ݙھالے،سوچ اتے رویاں کوں بدلݨ تے توجہ ݙتی ویسی تاں جو ہر شہری بجلی، گیس اتے پاݨی دی بچت کرے تاں جو ملکی معیشت تکڑی کرݨ، قیمتی غیر ملکی زرمبادلہ بچاوݨ اچ مدد ملے۔ کابینہ توانائی بچت مہم دی منظوری ݙیندے ایکوں فوری شروع کرݨ دی ہدایت کیتی۔ وزیراعظم آکھیا جو صوبہ خیبر پختونخواہ اتے صوبہ پنجاب اچ نگران حکومتاں وی توانائی بچت منصوبیاں حصہ ڳھنن۔ وفاقی کابینہ اچ توشہ خانہ بارے بین الوزارتی کمیٹی دی سفارشات دی جامع رپورٹ اتے توشہ خانہ دی نویں پالیسی دا مسودہ وی کابینہ اچ پیش کیتا ڳیا جیندے تے وزیراعظم ہدایت کیتی جو بین الوزارتی کمیٹی اپݨی رپورٹ اچ ترامیم کرتے اے سفارشات آندے کابینہ اجلاس اچ منظوری کیتے پیش کرے۔
