اسلام آباد۔26جنوری (اے پی پی) پاکستان اتے قازقستان تجارتی راہداری معاہدے تے دستخط کرݨ تے اتفاق کیتے۔ اے اتفاق رائے وفاقی وزیر تجارت سید نوید قمر نال قازقستان دے سفیر یرژان کستافین وچال خمیس کوں تھیوݨ آلی ملاقات اچ طے تھیا۔ ایں موقع تے قازقستان اتے پاکستان وچال تجارت دے ودھارے کیتے ممکنہ مواقعیاں تے ڳالھ مہاڑ کیتی۔ وفاقی وزیر سید نوید قمر آکھیا جو ݙوہیں ملکاں وچال مضبوط اقتصادی اتے تجارتی تعلقات کوں مستحکم کرݨ چاہندن۔ ݙوہیں فریقی معاہدیاں کوں توڑ پڄاوݨ دے عمل کوں تیز کریسن۔ انہاں آکھیا جو پاکستان آندے مہینیاں اچ تجارت تے سانجھے ورکنگ گروپ دے اگلے اجلاس دی میزبانی کریسی۔ قازقستان دے سفیر وفاقی وزیر دی حمایت تے انہاں دی تعریف کیتی اتے امید کیتی جو معاہدیاں کوں جلدی چھیکڑی شکل ݙتی ویسی۔ سید نوید قمر قازقستان دے سفیر کوں او آئی سی دے رکن ممالک دے 18ویں تجارتی میلے اچ بطور مزمان خصوصی سݙیا۔
