سکول توں باہر 2 کروڑ توں ودھ بالاں کوں سکولاں اچ داخل کرݨ اتے اڳوں ودھاوݨ دے موقع ݙتے ونجن، صدر مملکت ڈاکٹر عارف علوی دا اقراء یونیورسٹی دے 20ویں کانووکیشن دی تقریب توں خطاب

کراچی۔16فروری (اے پی پی) صدر مملکت ڈاکٹر عارف علوی آکھیا جو سکول توں باہر 2 کروڑ توں ودھ بالاں کوں سکولاں اچ داخل کرݨ اتے اڳوں ودھاوݨ دے موقع ݙتے ونجن۔ انہاں افسوس کیتا جو پاکستان دی تقریباً ݙاہ فیصد آبادی کوں انہاں دے بنیادی حق توں محروم رکھیا ڳے جیڑھا قوم کیتے ٻہوں نقصان اے۔ ملک دے نینگر اتے اشرافیہ کنے معاشرے دے ایں نظر انداز طبقے دی مدد اتےترقی کیتے وسائل اتے صلاحیت موجود اے۔ اے تعلیم یافتہ نینگراں اتے اشرافیہ دی اخلاقی ذمہ واری اے جو انہاں پسماندہ ٻالاں کوں مفید اتے ذمہ دار شہری ٻݨاوݨ کیتے تعلیم دے حصول اچ تعاونکرن۔ اے ڳالھیں انہاں خمیس کوں کراچی اچ اقراء یونیورسٹی دے 20ویں کانووکیشن دی تقریب توں خطاب کریندیں ہوئیں آکھی۔ ایں موقع تے حسین لاکھانی گروپ دے چیئرمین نوید لاکھانی، اقرا یونیورسٹی دی وائس چانسلر ارم اسد، سابق طلباء، فیکلٹی ممبران اتے فارغ التحصیل طلباء دے والدین وی موجودہن۔ تقریب توں خطاب کریندیں ہوئیں صدرمملکت صحت اتے تعلیم کوں ملک دی سماجی تے اقتصادی ترقی دی بنیاد قرار ݙتا اتے پاکستانی یونیورسٹیاں تے زور ݙتا جو او اپݨے طلباء کوں روزگار دے قابل ہنر نال آراستہ کرن۔ صدرمملکت ٻیا آکھیا جو نینگراں کوں جدید ٹیکنالوجی کوں اپناوݨ اتے جدت تحقیق اتے ترقی تے توجہ ݙیوݨی چاہیدی اے تانجو سائنس تے ٹیکنالوجی خصوصی آئی ٹٰی دے شعبے اچ تھیوݨ آلی نشابر تبدیلیاں نال خود کوں اپݨے ملک نال سنجاݨ کراون۔ ایں موقع تے صدر مملکت ڈاکٹر عارف علوی بہترین تعلیمی کارکردگی تے طلباء اچ گولڈ میڈل وی تقسیم کیتے۔ کانووکیشن دی تقریب اچ مختلف شعبیاں توں تعلق رکھݨ آلے اٹھ سو توں ودھ طلباء کوں ڈگریاں اتے میڈلز ݙتے ڳے۔