ترک قوم بہادر اتے عظیم قوم اے، ترک زلزلہ متاثرین دی بحالی تئین آرام نال نا ٻہسوں، وزیر اعظم شہباز شریف دی ترک سرکاری ٹی وی نال ڳالھ مہاڑ

آدیامان(ترکیہ)۔17فروری(اے پی پی)وزیر اعظم محمد شہباز شریف آکھیے جو ترک قوم بہادر اتے عظیم قوم اے، ترک زلزلہ متاثرین دی بحالی تئین آرام نال نا ٻہسوں، عالمی برادری ترکیہ دے متاثرین زلزلہ دی امداد کیتے اڳو آوے، امید اے رجب طیب اردوان دی اڳواݨی اچ تاریخ دے بدترین المیہ نال نمٹݨ اچ ترک قوم کامیاب تھی ویسی۔ اے ڳالھ انہاں ترکیہ دے زلزلہ متاثرہ علاقے آدیامان دے دورہ ویلھے ترکیہ دے سرکاری ٹی وی ٹی آر ٹی نال الیندے آکھی جو اے زلزلہ ہک وݙی آفت اے جیندے نال ٻہوں وݙا جانی تے مالی ضیان تھئے، میں پاکستان دے عوام اتے حکومت ولوں متاثرین نال ہمدردی کریندے پرچاوݨی ݙینداں جو اللہ فوت تھیوݨ آلیاں کوں جنت اچ ڄاہ ݙیوے اتے ورثا کوں صبر آوے۔ انہاں آکھیا جو پاکستان چھیکڑی زلزلہ متاثرہ دے اپݨے ڳھر آباد تھیوݨ تئیں آران نال نا ٻہسی، اے انسانی المیہ عالمی برادری دے سڄاک تھیوݨ دی کال اے، عالمی برادری، اقوام متحدہ، اسلامی تعاون تنظیم (او آئی سی) اتے ٻئے عالمی فورمز ایں اوکھے ویلھے ترکیہ دے بہادر عوام نال کھڑے تھیون، اے سیاست اتے ذات دی نئیں بقا دی جنگ اے۔