خدمات بہتر کرݨ، مطلوبہ مقاصد کیتے بیوروکریسی اچ فوری فیصلہ سازی دا جذبہ ابھارݨ دی لوڑھ اے، صدر مملکت ڈاکٹر عارف علوی

اسلام آباد۔2مارچ(اے پی پی)صدر مملکت ڈاکٹر عارف علوی خدمات بہتر کرݨ اتے مطلوبہ مقاصد کیتے بیوروکریسی اچ فوری فیصلہ سازی دا جذبہ ابھارݨ دی لوڑھ تے زور ݙیندے آکھیے جو بیوروکریسی دی سست فیصلہ سازی پاروں ناقص گورننس سودھا ملکی ترقی دی راہ اچ وی رکاوٹ آندی اے۔ اے ڳالھ انہاں نیشنل سکول آف پبلک پالیسی (این ایس پی پی) دے بورڈ آف گورنرز دے اجلاس دی صدارت کریندے آکھی۔ اجلاس اچ سپیشل سیکرٹری فنانس ڈویژن اویس منظور سمرا، سپیشل سیکرٹری اسٹیبلشمنٹ ڈویژن عصمت طاہرہ، ریکٹر این ایس پی پی ڈاکٹر اعجاز منیر اتے این ایس پی پی دی بورڈ آف گورنرز دی ایگزیکٹو کمیٹی دے سیکرٹری ندیم محبوب شرکت کیتی۔ بورڈ آف گورنرز دے ممبران جاوید صادق ملک، منیر کمال، زید بن مقصود، محمد حنیف چنہ اتے ڈاکٹر حفیظ احمد جمالی ویڈیو لنک تے شرکت کیتی۔ صدر چنڳے طرز حکمرانی اتے موثر خدمات سانڳے سرکاری ملازمین کوں جدید علم اتے تکنیک ݙیوݨ تے زور ݙتے۔ بورڈ آف گورنرز این ایس پی پی کوں نوجوان پروفیشنلز کوں انٹرنیز بھرتی کرݨ دی اجازت ݙیوݨ دی تجویز دی منظوری ݙتی۔ اجلاس اچ ملک دے سارے نیشنل انسٹی ٹیوٹس آف مینجمنٹ اچ کمپیوٹر آپریٹرز کوں بی پی ایس-11 توں بی پی ایس-16 اچ اپ گریڈ کرݨ اتے کمپیوٹر آپریٹرز دے عہدے دا ناں آئی ٹی آفیسرز اچ وٹاوݨ دی وی منظوری ݙتی۔ بورڈ 14 فروری 2023 دے فنانس ڈویژن دے آفس میمورنڈم دے مطابق بی پی ایس -1 توں بی پی ایس-16 اچ ملازمین کیتے خصوصی رعایت ݙیوݨ دی تجویز دی وی منظوری ݙتی۔