جدید ٹیکنالوجی نال آوݨ آلی نسلاں کوں تعلیم ݙیوݨ اساݙے جیوݨ دا مقصد ہووݨا چاہیدے، وزیراعظم محمد شہباز شریف دا تقریب توں خطاب

اسلام آباد۔21مارچ (اے پی پی) وزیراعظم محمد شہباز شریف آکھیا جو جدید ٹیکنالوجی نال آوݨ آلی نسلاں کوں تعلیم ݙیوݨ اساݙے جیوݨ دا مقصد ہووݨا چاہیدے۔ ہنرمندی دی تعلیم کوں ودھاوݨا چاہیدے، استادیں دی معیاری تربیت یقینی ٻݨائی ونڄے، وفاقی وزیرتعلیم صوبیاں نال رَل تے ہک پروگرام ٻݨاوݨ جئیں اچ استادیں کوں ٹیبلٹس ݙتے ونجن، استادیں اتے طلبا دی حاضری ڈیجیٹائز کیتی ونڄے اتے باقاعدگی نال سکول آوݨ آلے ٻالاں دی حوصلہ افزائی کیتی ونڄے۔ منگل کوں وزیراعظم ہاؤس اچ ٹیلی سکول پاکستان اپیلی کیشن دے افتتاح دے موقع تے تقریب توں خطاب کریندیں ہوئیں وزیراعظم آکھیا جو تعلیم بارے جدید ٹیکنالوجی دے ذریعے تعلیم دے ودھارے کیتے اے ہک چنڳا کم اے۔ ایں تے وزیر تعلیم، سیکرٹری تعلیم، چیئرمین پی ٹی سی ایل سودھے سارے متعلقہ افسراں کوں مبارخ ݙینداں۔ انہاں آکھیا جو پنجاب اچ اپݨے ݙاہ سال دے دور اچ میں ݙٹھے جو استادیں دی تربیت دا معیار چنڳا کائنی۔ وزیراعظم آکھیا جو پورے پاکستان اچ ہونہار طالب علماں اچ ایں سال ہک لکھ لیپ ٹاپ تقسیم کریسوں جیڑھے جو اٹے اچ لوݨ برابر اے۔ انہاں آکھیا جو ووکیشنل ٹریننگ سنٹرز کیتے پرائیویٹ سیکٹر اتے صوبائی حکومتاں نال رَل تے ایں پروگرام کوں اڳوں ودھایا ونجے۔ اساکوں اپݨے ٻالاں اتے ٻالڑیاں تے سرمایہ کاری کرݨی پوسی۔ ایں موقع تے انہاں ٻالاں اچ کروم بکس اچ تقسیم کیتے اتے ٹیلی سکول پاکستان ایپ دا افتتاح وی کیتا۔ پاکستان اچ پی ٹی سی ایل دے چیئرمین حاتم بامحترم آکھیا جو ایں اہم کم دے افتتاح دے اتھاں ہووݨ میݙے کیتے اعزاز اے۔ ایں تے وفاقی وزارت تعلیم کوں مبارخ ݙیندوں۔