نیشنل ڈیزاسٹر مینجمنٹ اتھارٹی زلزلے پاروں ملک دے ٻہوں سارے علاقیں اچ تھیوݨ آلے ضیان دی ابتدائی رپورٹ جاری کرݙتی

اسلام آباد۔22مارچ(اے پی پی) نیشنل ڈیزاسٹر مینجمنٹ اتھارٹی زلزلے پاروں ملک دے ٻہوں سارے علاقیں اچ تھیوݨ آلے ضیان دی ابتدائی رپورٹ جاری کرݙتی اے ۔ این ڈی ایم اے دی طرفوں جاری تفصیلات موجب منڳل کوں پاکستان اچ 6.8 شدت دا زلزلہ آیا۔ زلزلے دا مرکز افغانستان دا ہندوکش دا پہاڑی سلسلہ ہئی ، شدید زلزلے دے بعد 3.7 شدت دا ھک آفٹر شاک وی ریکارڈ کیتا ڳئے ۔ رپورٹ موجب زلزلے پاروں خیبرپختونخوا اچ 2 بندے جاں بحق تھئن جݙاں جو وکھو وکھ جاہواں تے 66 لوک معمولی طور تے زخمی تھئن ۔ صوابی اچ گھر دی چھت ڈھݨ توں 5 بندے زخمی تھئن ، چترال اچ گھر دی چھت تے کندھی ڈھݨ توں 2 بندے زخمی تھئن ۔ خیبر اچ چھت کوں ضیان پڄا تاں جو کوئی جانی ضیان نی تھیا سوات اچ چھت تے باؤنڈری وال ڈھݨ دے واقعات دی اطلاعات ہن ، مدین اچ کندھی ڈھݨ توں 1 ٻال جاں بحق تھئے ۔ لوئر دیر اچ چھت ڈھݨ دے نتیجے اچ 1بندہ جاں بحق اتے 1 شخص زخمی تھئے ۔ مردان، باجوڑ اتے لوئر چترال اچ 1 بندہ زخمی تھیوݨ دی اطلاع اے ۔ وکھو وکھ جہیں تے تقریباً 60 لوکاں کوں معمولی دھک لڳئن تاں جو ایں بارے درست تعداد اتے تفصیلات جمع کیتیاں ویندیاں پئن ۔ رپورٹ موجب زلزلے دے بعد گلگت بلتستان دے علاقے استوراچ لینڈ سلائیڈنگ پاروں رستہ بلاک تھی ڳئے ۔ ایں توں انڄ اسلام آباد اچ عمارتاں اچ دراڑاں پووݨ دی اطلاعات ہن ، ایں توڄہ توں سیکٹر ای الیون اچ خداداد ہائٹس بلڈنگ توں سارے رہائشیاں کوں بحفاظت کڈھ ڳھدا ڳیا ہئی جݙاں جو ہݨ تئیں کہیں عمارتی ڈھانچے دے ڈھݨ یا یا خطرے توں ݙوچار تھیوݨ دی اطلاع کائنی ۔ مزید پنجاب، بلوچستان اتے آزاد جموں وکشمیر اچ کہیں جانی یا مالی ضیان دی کوئی اطلاع کائنی ۔ رپورٹ اچ آکھیا ڳئے جو فیلڈ یونٹس/مقامی انتظامیہ توں تفصیلی معلومات کٹھیاں کیتیاں ویندیاں پئن ۔ ریسکیو 1122 موجب حالی تئیں کہیں بئی ہنگامی صورتحال دی اطلاع کائنی۔