سماجی انصاف تے ٻالاں کوں تعلیم ݙیوݨ نال چائلڈ لیبر دا خاتمہ ممکن اے،صدر مملکت ڈاکٹر عارف علوی

اسلام آباد۔12جون  (اے پی پی):صدر مملکت ڈاکٹر عارف علوی ملک اچ ٻالاں دے حقوق دے تحفظ اتےچائلڈ لیبر دے خاتمے  کیتے  کوششاں تکھیاں کرݨ دی لوڑھ تے زور ݙیندے ہوئیں آکھیے سماجی انصاف دے ودھارے تے ٻالاں کوں تعلیم ݙیوݨ یقینی بݨا تے چائلڈ لیبر کوں ختم کیتا ونڄ سڳدے ۔ ایوانِ صدر دے پریس ونگ توں سنوار کوں جاری بیان موجب صدر مملکت اے ڳالھ ٻالاں دی مشقت (چائلڈ لیبر) دے عالمی ݙینھ دے موقع تے آپݨے پیغام اچ آکھی اے ۔ انہاں آکھیے اے ݙینھ چائلڈ لیبر دے خاتمے اتے ایں بارے آگاہی ݙیوݨ کیتے منایا ویندا پئے ، ٻالاں دی مشقت عالمی سطح تے درپیش ھک وݙا چیلنج اے، اقوامِ متحدہ موجب دنیا اچ تقریباً 16 کروڑ ٻال مشقت تے مجبور اتے ہر 10 اچوں ھک ٻال مزدوری کریندا ہئے ۔انہاں آکھیے عالمی سطح تے چائلڈ لیبر اچ کمی آئی تاں جو حالی وی مزید کم کرݨ دی لوڑھ اے ، سماجی انصاف دے ودھارے نال ٻالاں دی مشقت دے چیلنج تے قابو پاتا ونڄ سڳدے ۔ انہاں آکھیے چائلڈ لیبر دے خاتمے  کیتے ایندی بنیادی وجوہات تے قابو پاوݨا ہوسی ، غربت، جنگ، دہشتگردی اتے تعلیم تئیں رسائی نہ ہووݨ وی چائلڈ لیبر دی وݙی وجوہات ہن۔ صدر آکھیے پاکستان اچ ٻالاں دے حقوق دے تحفظ اتے چائلڈ لیبر دے خاتمے  کیتے  کوششاں تکھیاں کرݨیاں ہوسن ، ایں حوالے نال حکومت، معاشرے ، نجی شعبے اتے سول سوسائٹی کوں آپݨا کردار ادا کرݨا ہوسی ، انہاں آکھیے جو میڈیا، آجرتے  نجی شعبے سودھے معاشرے دے سارے طبقات چائلڈ لیبر دے خاتمے کیتے رل تے کم کرن ۔