پاکستان بیت المال دے سارے کماں دی ڈیجیٹیلائزیشن شروع تھی ڳی اے، سویٹ ہومز اچ پڑھݨ آلے یتیم ٻالاں کوں گریجوایشن تئیں تعلیم ݙیوݨ دا اصولی فیصلہ کر ڳھدے، یتیم ٻالاں کیتے شہراں اچ یوتھ ہاؤس ٻݨائے ویسن،عامر فدا پراچہ

اسلام آباد۔13جون  (اے پی پی) پاکستان بیت المال دے منیجنگ ڈائریکٹر ملک عامر فدا پراچہ آکھیا جو پاکستان بیت المال دے سارے کماں دی ڈیجیٹیلائزیشن شروع تھی ڳی اے، ایں نال نہ صرف شفافیت امسی جڈانجو قومی تے بین الاقوامی ’’ڈونرز‘‘ کوں وی ایں کار خیر اچ حصہ پاوݨ کیتے راغب کیتا ونڄ سڳسی۔ 50 سویٹ ہومز اچ پڑھݨ آلے یتیم ٻالاں کوں گریجوایشن تئیں تعلیم ݙیوݨ دا اصولی فیصلہ کر ڳھدے، یتیم ٻالاں کیتے شہراں اچ یوتھ ہاؤس ٻݨائے ویسن۔ اسلام آباد اتے گلگت بلتستان اچ یتیم ٻالاں کیتے یوتھ ہاؤس دے بعد ہݨ باقی شہراں اچ وی مرحلہ وار یوتھ ہاؤس ٻݨائے ویسن۔ اے ڳالھیں انہاں منگل کوں   قومی خبررساں ادارے’’ ایسوسی ایٹڈ پریس آف پاکستان ‘‘(اے پی پی) کوں خصوصی انٹرویو اچ آکھی۔ملک عامر فدا پراچہ آکھیا جو  پاکستان بیت المال دے تحت امداد دے مختلف منصوبے جئیں اچ شیلٹر ہومز، سویٹ ہومز، پاکستان تھیلے سیمیا سینٹر، انفرادی مالی معاونت، تے یمن ایمپاورمنٹ سینٹرز،پاکستان بیت المال سکول، پرسن و د ڈس ایبلٹی، اولڈ ایج ہوم سودھے مختلف بیماریاں دے علاج بارے طبی تعاون شامل اے، ،22۔2021  وچال پاکستان بیت المال توں طبی معاونت دے 13719کیسز،تعلیمی وظائف دے 5ہزار769، ایجوکیشن سٹاپن دے18ہزار 375، سپیشل پرسنز دے 5ہزار 68 جڈانجو شیلٹر ہومز توں ہک کروڑ75ہزار716 لوکاں فائدہ چاتے۔ انہاں ݙسیا جو جینویں میکوں ایں ادارے دی سربراہی ملی تاں ایں کارخیر اچ ملکی تے غیر ملکی ’’ ڈونرز ‘‘ کوں ایں پاسے راغٻ کرݨ میݙی پہلی ترجیح ہئی ایں کیتے ادارے دے سارے پراجیکٹس دی ڈیجیٹلائزیشن ضروری ہئی ایں تے جنگی بنیاداں تے کم شروع کر ݙتا۔ ایں نال ادارہ ’’ پیپر لیس‘‘اتے منصوبیاں اچ شفافیت امسی اتے ڈونرز دا اعتماد ودھسی۔ ایم ڈی پاکستان بیت المال ملک عامر فدا پراچہ آکھیا جو یتیم ٻالاں اچ قوت سماعت اتے قوت گویائی توں محرومی ماء پیو کیتے ہک وݙی آزمائش توں ڳھٹ نی، ایندا علاج مہانگا اے، ہک ٻال دے کوکلر ایمپلانٹ تے تقریباً 19 لکھ روپے خرچہ تھیندے اتے اگر انہاں ٻالاں کوں اے لڳ ونڄے تاں او ٻال سݨݨ اتے ٻولݨ شروع کر ݙیندن۔ اے ایمپلانٹ انہاں ٻالاں کیتے ’’لائف چینجر‘‘ ثابت تھیندے۔ وفاقی وزیر سماجی تحفظ تے تخفیف غربت شازیہ مری،اساݙے ڈویژن اتے خزانہ دے سیکرٹریز اتے اساں ساریاں دی کوششاں رنگ ڳھن آئن، ہݨ سݨݨ اتے ٻولݨ توں محروم ٻال پںج سال دی عمر تئیں، دا کوکلر ایمپلانٹ، پاکستان بیت المال دے بجٹ اچ رلا ݙتا ڳے۔ ہک سوال دے ولدے اچ انہاں آکھیا جو میݙی پہلی کوشش اے جو کوکلرایمپلانٹ دے اݙھائی ارب مالیت دے پھتے کیسز کوں ںبیڑیا ونڄے۔ انہاں آکھیا جو پاکستان بیت المال دے پورے ملک اچ پنڄاہ سویٹ ہومز ہن جتھ ٻالاں دی کفالت تھیندی پی اے۔ پاکستان بیت المال دا ہر ضلع اچ ویمن ایمپاورمنٹ سینٹرز چلدا پے ، سٹریٹ چلڈرن کیتے ہر ضلعے اچ ایس آر سی ایل دے ناں نال سکول چلدے پن۔ ہر طرح دے میڈیکل،سرجری اتے دوائیں دی امداد، جیڑھے ٻال اعلیٰ تعلیم دے خرچے نی برداشت کر سڳدے انہاں کوں سکالرشپ ݙیندے پیوں۔ ایم ڈی بیت المال ملک عامر فدا پراچہ آکھیا جو میݙی اوپن ڈور پالیسی اے، اساݙے کنے ایجھے لوک امدن جنہاں کوں اچاچیت مالی امداد دی لوڑھ ہوندی اے، بطور شاک آبزرور ادارے دے طور تے اوپن ڈور پالیسی دے تحت متاثرین نال خود ملداں اتے سیاسی وابستگی یا رنگ و نسل توں ہٹ تے فوری ازالے دی ہرممکن کوشش کرینداں۔ انہاں آکھیا جو پاکستان بیت المال دا پندھ لمبا اے۔ سابق وزیراعظم محمد نواز شریف دے دور اچ 1991 اچ ایں ادارے اپݨا پندھ شروع کیتا۔  محترمہ بے نظیر بھٹو آئی تاں انہاں ایں ادارے اچ ویمن ایمپاورمنٹ سینٹرز شروع کیتا۔2008 اچ سویٹ ہومز شروع تھیا۔ ہک سوال دے ولدے اچ انہاں آکھیا جو بیت المال دے مالی سال 2023-24 دے بجٹ بارے ݙسیا جو ایں بجٹ اچ ہک ارب روپے دا ودھارا تجویز کیتا ڳے، گزریل ترائے سالیں توں پاکستان بیت المال دے بجٹ اچ کوئی ودھارا کائنا تھیا ہئی۔ انہاں ݙسیا جو پاکستان بیت المال دے سٹریٹ چلڈرن کیتے چلائے ڳے سکولاں اچ پرائمری تئیں تعلیم ݙتی ویندی پی ہئی۔ میں امدیں اینکوں اٹھویں تئیں کر ݙتا۔ اینویں پہلے سیوٹ ہومرز اچ ٻالاں کوں میٹرک تئیں تعلیم ݙتی ویندی ہئی ہݨ اینکوں ودھا تے گویجویشن کر ݙتے۔ انہاں آکھیا جو سکالر شپ بارے یونیورسٹیاں کوں آکھیا ڳے جو او دیہاتی، پسماندہ علاقے اتے بلوچستان کیتے ودھیکی کوٹہ تے عمل کراون۔ تعلیمی وظائف نال ٻہوں ٻال ایں قابل ٻݨین جو او ملک تے قوم دی خدمت کرن۔