سمندری طوفان بپر جوائے دی شدت ڳھٹ تھی ڳی اے، اے 15 جون دی ݙوپہر کیٹی بندر اتے بھارتی گجرات دے ساحل دے وچلی علاقے اچ ٹکرا سڳدے، شیری رحمن دی چیئرمین این ڈی ایم اے دے رلے پریس کانفرنس

اسلام آباد۔13جون (اے پی پی) وفاقی وزیر برائے موسمیاتی تبدیلی تے ماحولیاتی رابطہ سینیٹر شیری رحمن آکھیا جو سمندری طوفان بپر جوائے دی شدت ڳھٹ تھی ڳی اے، اے 15 جون دی ݙوپہر کیٹی بندر اتے بھارتی گجرات دے ساحل دے وچلی علاقے اچ ٹکرا سڳدےم ایں بارے خطرہ اڄاں وی ہے پیا، ایں بارے کہیں وی قسم دی افراتفری نہ کیتی ونڄے اتے احتیاط کیتی ونڄے۔ صورتحال بارے محتاط رہݨ اتے لوکاں کوں ایں بارے مسلسل ݙساوݨ دی لوڑھ اے۔ خطرے آلے علاقیاں توں لوکاں کوں کݙھݨ اتے انہاں کوں محفوظ ڄاہ تے پجاوݨ کیتے کیمپس ٻݨاوݨ سودھے ٻے اقدامات شروع کر ݙتن۔ اے ڳالھیں انہاں منگل کوں چیئرمین این ڈی ایم اے لیفٹیننٹ جنرل انعام حیدر ملک دے رلے پریس کانفرنس توں خطاب کریندیں ہوئیں آکھی۔ وفاقی وزیر آکھیا جو سمندری طوفان بپر جوائے دی شدت ڳھٹ تھی ڳی اے، اے 15 جون دی ݙوپہر کیٹی بندر اتے بھارتی گجرات دے ساحل دے وچلی علاقے اچ ٹکرا سڳدے۔انہاں آکھیا جو بپر جوائے ٻہوں شدید طوفان اچ بدل ڳے جئیں دی سطح تے ہوائیں دی رفتار 140 توں 150 کلومیٹر اے جڈانجو ایندے مرکز اچ 170 کلومیٹر فی گھنٹہ اے۔ طوفان کراچی توں 440 کلومیٹر جنوب، ٹھٹھہ توں 430 کلومیٹر پرے اتے اورماڑہ توں 555 کلومیٹر جنوب مشرق اچ اے۔ انہاں آکھیا جو سمندری طوفان دے جون 14 دی سویل تئیں شمال آلے پاسے اتے بعد اچ مشرق آلے پاسے رخ بدلݨ دا امکان اے۔ سمندری طوفان پاروں ٹھٹھہ، بدین، سجاول، تھرپارکر، کراچی، میرپور خاص، عمرکوٹ، حیدرآباد، اورماڑہ، ٹنڈو الہٰ یار خان اتے ٹنڈو محمد خان دے علاقے متاثر تھی سڳدن جتھ تکھی ہوائیں نال زور دا مینہ وسݨ دا امکان اے۔