بپرجوائے مزید کمزور تھی تے کیٹیگری ون دے سمندری طوفان اچ بدل ڳئے ، این ڈی ایم اے

اسلام آباد۔16جون(اے پی پی) بحیرہ عرب توں چوݨ آلا انتہائی شدید سمندری طوفان بائپرجوائے مزید کمزور تھی تے کیٹیگری ون دے سمندری طوفان اچ بدل ڳئے جمعہ دی شام تئیں ایندی شدت مزید گھٹ تھیوݨ دا امکان اے ۔ نیشنل ڈیزاسٹر مینجمنٹ اتھارٹی موجب جمعہ دی ݙوپہر سمندری طوفان کیٹی بندر توں 145، ٹھٹھہ توں 169 اتے کراچی توں 230 کلومیٹر جنوب مشرق وچ ہئی ۔ طوفان دی سطح تے ہوا دی رفتار 80 توں 90 کلومیٹر فی گھنٹہ جݙاں جو ایندے مرکز دے نیڑے 110 کلومیٹر فی گھنٹہ ریکارڈ کیتی ڳئی۔ سمندر اچ لہروں دی اوچائی 10 توں 12 فٹ اُچی ہئی ۔ واضح رہے جو طوفان دے پاکستان دی ساحلی پٹی تے ممکنہ اثرات ایندی مزید پیشرفت تے منحصر ہن ۔ متعلقہ ادارے کہیں وی ہنگامی صورتحال نال نبݨݨ کیتے تیار اے ۔ طوفان دے مکمل اثرات ختم تھیوݨ تئیں عوام کوں محتاط رہݨ دا مشورہ ݙتا ڳئے۔