پاک بحریہ دا سندھ دے سمندری طوفان توں متاثرہ علاقیں اچ ریسکیو اتے ریلیف آپریشن جاری

کراچی۔ 17 جون (اے پی پی):پاک بحریہ سندھ دے پرے دے ساحلی علاقیں اچ ریلیف آپریشنز اتے امدادی سرگرمیاں جاری رکھیاں ہوئیاں ہن ۔پاک بحریہ دی طرفوں جاری اعلامیہ موجب پاک بحریہ دی ایمرجنسی رسپانس ٹیماں مقامی انتظامیہ نال رل تے طوفان توں متاثرہ لوکاں کوں محفوظ جاہ تے منتقل کیتا تے کھاوݨ پیوݨ دیاں چزیاں ݙتیاں ۔ پاک بحریہ دے دستیں کیٹی بندر، کھارو چن، شاہ بندر، باغان، سجاول، چوہڑ جمالی اتے جاتی شہر نال جڑیے ساحلی علاقیں توں 800 توں ودھ مکیناں کوں محفوظ جاہ تے منتقلی اچ مدد کیتی ، ایں توں انڄ کیٹی بندر اچ عالمی ادارہ صحت اتے محکمہ صحت حکومت سندھ دے تعاون نال میڈیکل کیمپ لاتا ڳئے ۔ عالمی ادارۂ صحت اچ پاکستان دے ہیڈ ڈاکٹر پالیتھا ماہی پالا میڈیکل کیمپ دادورہ کیتے تے سرگرمیاں دی نگرانی کیتی۔  میڈیکل کیمپ اچ سینکڑاں لوکاں کوں طبی معاونت اتے مچھرداݨیاں وی ݙتن ۔ پاک بحریہ دی میڈیکل ٹیماں شیلٹر کیمپاں اچ متاثرین کوں طبی سہولتاں ݙیندی پئی اے جݙاں جو پاک بحریہ دے جہاز اتے ایمرجنسی رسپانس ٹیماں کھلے سمندر اتے ساحلی علاقیں اچ پٹرولنگ جاری رکھی ہوئی اے تاں جو متاثرہ لوکاں دی مدد کیتی ونڄ سڳے ۔ سندھ دے ساحلی علاقیں توں سمندری طوفان دے ممکنہ ٹکراؤ پاروں پاک بحریہ دی ایمرجنسی رسپانس ٹیماں مقامی لوکاں کوں ریسکیو اتے ریلیف ݙیوݨ کیتے ہر ویلھے تیار اے۔