یونان ٻیڑی حادثے اچ زندہ بچ ونڄݨ آلیں اچوں 12 پاکستانیاں دی شناخت تھی ڳئی اے، دفتر خارجہ

اسلام آباد۔17جون(اے پی پی) یونان دے ساحل تے ٻݙݨ آلی ٻیڑی اچ زندہ بچ ونڄݨ آلیں اچوں 12 پاکستانیاں دی شناخت تھی ڳئی اے تاں جو حالی تئیں مرݨ آلیں اچ پاکستانی شہریاں دی تعداد تے شناخت دی تصدیق نی تھی سڳی ۔وزارت خارجہ دی ترجمان ممتاز زہرہ بلوچ آپݨے ھک بیان اچ آکھیے یونان اچ پاکستانی مشن سفیر عامر آفتاب دی سربراہی اچ مقامی حکام نال رابطے اچ ہے تاں جو جاں بحق تھیوݨ آلے تے زندہ بچ ونڄݨ آلے پاکستانی شہریاں دی شناخت ، بازیابی اتے امداد ݙتی ونڄ سڳے۔ انہاں آکھیے ساݙا مشن 78 برآمد شدہ لاشاں دی شناخت دے عمل اچ یونانی حکام نال رابطے وچ ہے ، اے شناختی عمل نیڑے خاندان دے لوکاں (صرف والدین اتے ٻالاں) دے نال ڈی این اے میچنگ دے ذریعے تھیسی ۔ انہاں مزید آکھیے بدقسمت ٻیڑی تے سوار ممکنہ مسافراں دے اہل خانہ توں درخواست کیتی ڳئی اے جو او تصدیق دے مقاصد کیتے یونان اچ پاکستان  مشن توں 24/7 ہیلپ لائن نمبرز تے رابطہ کرن ۔انہاں توں اے وی درخواست اے جو او مستند لیبارٹریاں توں ڈی این اے رپورٹس اتے مسافر دی شناختی دستاویزات ‘[email protected]’ تے شیئر کرن۔واضح رہے جو اقوام متحدہ دے انسانی حقوق دے حکام آکھیے جو یونان دے نیڑے ٻݙݨ آلی تارکین وطن دی کشتی توں 500  توں ودھ حالی تئیں لاپتہ ہن۔ “خوفناک سانحہ” اچ لاپتہ تھیوݨ آلیں اچ تریمتاں تے ٻالاں دی ھک وݙی تعداد شامل ہئی جیں اچ 78 لوک ہلاک تھئے ہن ، بین الاقوامی میڈیا موجب ماہی گیری دی ٻیڑی اچ 750 لوک سوار ہن جیڑھے جنوبی یونان اچ پائیلوس توں 50 ناٹیکل میل پرے بݙ ڳئی ہئی ۔