وزیراعظم شہباز شریف دی آئی ایم ایف دی منیجنگ ڈائریکٹرکرسٹالینا جارجیوا نال ملاقات، پاکستان اتےآئی ایم ایف وچال جاری پروگراماں اتے تعاون تے ڳالھ مہاڑ

پیرس۔22جون  (اے پی پی) وزیراعظم محمد شہباز شریف عالمی مالیاتی فنڈ(آئی ایم ایف) دی منیجنگ ڈائریکٹرکرسٹالینا جارجیوا  نال ملاقات کیتی۔ خمیس کوں وزیراعظم آفس دے میڈیا ونگ توں جاری بیان موجب ، جو پیرس اچ ’’نیوگلوبل فائنانسنگ  پیکٹ ‘‘دے سربراہ اجلاس اچ شرکت کیتے فرانس دے دورے تے ہن، آئی ایم ایف دی منیجنگ ڈائریکٹر نال ملاقات اچ پاکستان اتے آئی ایم ایف وچال جاری پروگراماں اتے تعاون تے ڳالھ مہاڑ کیتی۔ وزیراعظم 27 مئی 2023 کوں ٹیلی فون تے تھیوݨ آلی ڳالھ مہاڑ دا حوالہ ݙیندیں ہوئیں   آئی ایم ایف دی منیجنگ ڈائریکٹرکوں پاکستان دی معاشی صورتحال  بارے ݙسیا۔ وزیراعظم معاشی ترقی اتے استحکام کیتے حکومتی اقدامات دا خاکہ پیش کیتا۔ انہاں آکھیا جو ایکسٹینڈڈفنڈ فیسیلٹی (ای ایف ایف ) دے تحت نانویں جائزے کیتے سارے پیشگی اقدامات پورے تھی ڳن اتے پاکستان دی حکومت آئی ایم ایف نال طے تھیوݨ آلے اپݨی ذمہ واریاں پوری کرݨ دا عزم کیتے۔ انہاں توقع کیتی جو آئی ایم ایف دے ای ایف ایف دے تحت مختص فنڈز جلدی توں جلدی جاری کر ݙتے ویسن۔ آئی ایم ایف دی منیجنگ ڈائریکٹر وزیراعظم  کوں جائزہ ڳھنݨ دے جاری عمل بارے اپݨے کردار دے نکتہ نظر بارے ݙسیا۔ ملاقات اچ وفاقی وزیر ماحولیاتی تبدیلی شیری رحمان،وفاقی وزیر اقتصادی امور سردار ایاز صادق،وفاقی وزیر اطلاعات ونشریات  مریم اورنگزیب،وزیرمملکت برائے خزانہ ڈاکٹرعائشہ غوث پاشا، وزیراعظم دے معاون خصوصی طارق فاطمی اتے فرانس اچ پاکستان دے سفیر عاصم افتخاراحمد وی موجود ہن۔