قرآن پاک دی بے حرمتی دا واقعہ قابل مذمت اے، ملک دی ترقی و خوشحالی کیتے رل تے کم اتے دیرپا فیصلے کرݨے ہوسن، وزیراعظم دا وفاقی کابینہ اجلاس نال خطاب

اسلام آباد۔3جولائی(اے پی پی)وزیراعظم محمد شہباز شریف دی اڳواݨی اچ تھیوݨ آلے وفاقی کابینہ دے اجلاس سویڈن اچ قرآن پاک دی بے حرمتی دے واقعہ دی مذمت کریندے سویڈش حکومت توں مطالبہ کیتے جو او مجرماں دے خلاف سخت کارروائی اتے اڳو تے اینڄھے واقعات روکݨ کیتے اقدامات کرے، ملک دی ترقی و خوشحالی کیتے حکومت، سیاستداناں اتے اداراں کوں رل تے کم کرݨا چاہیدے، اشرافیہ وݙے صنعتکاراں سودھا ساریاں کوں ایثار و قربانی ݙیوݨی ہوسی، آئی ایم ایف معاہدہ نال ساکوں ساہ قھنݨ دا موقع ملیے، مستقبل کیتے دیرپا فیصلے کرݨے ہوسن۔ اجلاس نال خطاب کریندے وزیراعظم دعا کیتی جو ﷲ دے فضل نال ملک ترقی کریسی اتے محنت رنگ ڳھن آسی، پچھلے 14 مہینے توں درپیش چیلنجز نال نمٹݨ کیتے پوری کوشش کیتی اے، آئی ایم اف نال معاہدے دی کامیابی تے پوری کابینہ، وزیر خزانہ، انہاں دی ٹیم اتے متعلقہ وزارتاں کوں مبارکباد ݙینداں، امید اے 9 مہینے دے سٹینڈ بائی معاہدہ دے 3 ارب ڈالر اچوں پہلی قسط جولائی اچ 1.1 ارب ڈالر دی ملسی، وزیر خزانہ ݙسائے جو ایں سانڳے ہݨ صرف کڄھ دستاویزی اقدامات کرݨن، اوکھے ویلھے چین دی مدد نسے بھل سڳدے۔ انہاں آکھیے جو سعودی عرب اتے یو اے ای وی بھراواں آلی کار ہتھ ونݙائے، ایں سانڳے اسلامی ترقیاتی بینک دے صدر وی ہک ارب ڈالر دا وعدہ کیتے، سعودی عرب 2 ارب ڈالر اتے متحدہ عرب امارات ہک ارب ڈالر دا آکھیے۔ انہاں دعا کیتی جو سافا اے آئی ایم ایف نال پروگرام چھیکڑی ہووے اتے ولا قرض دا ٹھوٹھا نا چاوݨا پووے۔ انہاں آکھیا جو سویڈن اچ قرآن پاک دی بیھرمتی دے واقعے تے حکومت پاکستان شدید مذمت کریندے ہوئے او آئی سی اجلاس دے اعلامیے دی مکمل حمایت کریندی اے، امید اے اڳو تے اینڄھا واقعہ پیش نا آسی، اساں اپݨی وزارت خارجہ توں ایں معاملے دا بھرپور فالو اپ کریسوں۔