طلباوطالبات کوں تعلیم کیتے وسائل ݙیوݨ حکومت دی ذمہ واری اے ، آئی ایم ایف توں قرضہ گھنݨ لمحہ فخریہ کائنی لمحہ فکریہ اے، اپݨا ونڄا مقام گھندے رہسوں ، وزیراعظم شہبازشریف دا تقریب توں خطاب

اسلام آباد۔12جولائی(اے پی پی):وزیراعظم محمد شہبازشریف آکھیے تعلیم دے ودھارے توں ہی ترقی ممکن اے، طلباوطالبات کوں تعلیم ݙیوݨ حکومت دی ذمہ داری اے، ہمسائیہ ملک ترقی اچ اساں توں اڳوں نکل ڳئن ، اساں پچھوں رہ ڳیوں ،   اپݨا ونڄا مقام حاصل کرتے رہسوں ،آئی ایم ایف توں قرضہ گھنݨ لمحہ فخریہ کائنی لمحہ فکریہ اے، چین اتے  سعودی عرب اوکھ اچ ساݙا ہتھ وٹھیے ، متحدہ عرب امارات توں ھک ارب ڈالر ھک ݙو ݙینھ اچ آویسن ، سیاستدان ، جج ، جرنیل ،  ڈاکٹر اتے ٻئے شعبیں توں تعلق رکھݨ آلے ماہرین ملک دی تقدیر بدلݨ کیتے اڳوں آون ۔اے ڳالھ انہاں ٻدھ کوں اتھاں پاکستان ایجوکیشن انڈوومنٹ فنڈ اتے قومی نصاب اچ اصلاحات  دے آغاز دی تقریب توں خطاب کریندے ہوئیں آکھی اے ، ایں موقع تے وفاقی وزیر تعلیم و پیشہ وارانہ تربیت  رانا تنویر حسین، وزیراعظم  دے معاون خصوصی امور نوجوانان  شزہ فاطمہ اتے سیکرٹری ایجوکیشن وسیم اجمل دے علاوہ طلبا و طالبات دی وݙی تعداد موجود ہئی۔ وزیراعظم آکھیے اڄ میں کیتے ٻہوں خوشی دا ݙینھ اے اوشعبہ جیں دے ذریعے دنیاترقی کیتی اے ایں کیتے اتھاں اساں موجود ہیسے ۔ 2008 اچ پنجاب توں اساں ایں سفر کوں شروع کیتا ہئی ۔  تعلیم دے ذریعے ہی دنیا ترقی کیتی اے ۔ ڈاکٹر امجد ثاقب دے مشورے تے 2008 اچ انڈوومنٹ فنڈ  قائم کیتا ہئی تے اوں ویلھے 2 ارب روپے رکھئے ہن تے ایندے توں چار لکھ توں ودھ قابل ، محنتی  اتے ذہین طلبا وطالبات کوں تعلیمی و ظائف ݙتے ڳئے ہن جیڑھے جو بعد اچ ڈاکٹرز ، انجینئرز اتے ٻئے شعبیں اچ انہاں کارنامے انڄام ݙتے ، انہاں وظائف توں ہزاراں غریب طلبا اپݨی تعلیم مکمل کیتی۔  وزیراعظم آکھیے اساں قوم دے کروڑاں ٻال تے ٻالڑیاں تے آپݨے مالی وسائل خرچ نہ کیتے تاں اے سفر ادھورا اے ۔ اڄوکے سال 14 ارب روپے  انڈوومنٹ فنڈ کیتے رکھیے ڳئن جیڑھے جو گھٹ ہن لیکن ساݙی مالی مشکلات  ٻہوں زیادہ ہن۔ ہمیشہ تعلیمی وظائف ودھاوݨ دی کوشش کیتی۔ اساں فیصلہ کیتے جو اڄوکے سال مختص 3 ارب روپے غریب  طلبا وطالبات  کوں ݙتے ویسن ، اساں چاہندوں اے رقم اڳلے 10 سالاں اچ 14 ارب توں ودھ تے 40 ارب تئیں پڄ ونڄے ساݙے طلبا و طالبات  اپݨی تعلیم دے سلسلے کوں مکمل کر سڳن اللہ تعالیٰ پاکستان کوں معدنی اتے ٻئے قدرتی وسائل نال نوازیے ۔ اوکھا ویلھا وختی لنگھ ویسی تے پاکستان ھک مستحکم ملک بݨسی ۔ پاکستان ایجوکیشن انڈوومنٹ فنڈ تے ملک دے طلبا دا حق اے۔