پی ٹی آئی حکومت 4 سال برباد کرݙتے ، وزیراعظم شہباز شریف دی ملتان اچ نشتر ۔2ہسپتال دا معائنہ کریندے ویلھے ڳالھ مہاڑ ، ملتان اچ میڈیکل سٹی بݨاوݨ دا اعلان

ملتان۔13جولائی(اے پی پی):وزیرِاعظم محمد شہباز شریف آکھیے پی ٹی آئی حکومت 4 سال برباد کرݙتے، عمران نیازی 4 سال ہتھ تے ہتھ رکھ تے ٻیٹھے رہیے تے چور ڈاکو دے نعرے لاتے ویلھا برباد کیتا ۔ ملتان اچ زیر تعمیر نشتر ۔II ہسپتال دے معائنے ویلھے ڳالھ مہاڑ کریندے ہوئیں وزیراعظم آکھیے 2018 اچ مسلم لیگ (ن) دی حکومت ایں منصوبے دا باقاعدہ افتتاح کیتا ہئی تے سارے تمام لوازمات مکمل کیتے ہن ۔ جھرلو الیکشن دے بعد جیڑھے عمران نیازی کوں مونڈھے تے ٻلہا تے اقتداراچ گھن آئے ہن انہاں کوں چاہیدا ہئی جو عمران نیازی توں اے ہسپتال بݨویندے تاں جو ݙکھی انسانیت دی خدمت  تھی سڳدی لیکن پی ٹی آئی حکومت 4 سال برباد کرݙتے تے زیر تعمیر نشتر ۔II ہسپتال کیتے صرف 3، 4  ملین روپے مختص کیتے جیڑھا جو ھک مذاق ہئی۔ ایں ہسپتال کوں صرف ایں کیتے نظر انداز کیتا ڳئے جو کتھائیں مسلم لیگ (ن) اتے نواز شریف کوں کریڈٹ نہ مل ونڄے ۔ وزیراعظم آکھیے میکوں ݙسایا ڳئے جو ایں ہسپتال دی تعمیر  30 ستمبر تئیں مکمل تھی ویسی ، اے عوامی خدمت دا منصوبہ اے۔ وزیراعظم نگران وزیراعلیٰ محسن نقوی تے ضلعی انتظامیہ دے افسران کوں ایں منصوبے دی تکمیل کیتے ݙینھ رات کوششاں تے خراج تحسین پیش کتیے ۔ انہاں آکھیے مسلم لیگ (ن) کوں حمزہ شہباز دی قیادت اچ تھوڑے ویلھے کیتے پنجاب اچ خدمت داموقع ملیا لیکن جیڑھا کجھ انہاں دے نال تھئے او وی تاریخ دا حصہ اے۔  ماضی اچ ساݙیاں حکومتاں ختم نہ کیتیاں ویندیاں تے عمران نیازی کوں اقتدار اچ نہ گھن آیا ویندا تاں پاکستان ترقی دے رستے ٹر چکیا ہوندا ۔ او4 سال  ہتھ تے ہتھ رکھ تے ٻیٹھے رہیے تے چور ڈاکو دے نعرے لیندے رہیے۔ وزیراعظم آکھیے انہاں کوں ݙسایا ڳئے جو ہسپتال کیتے مشینری وی درآمد کر ڳھدی ڳئی اے ۔ انہاں ملتان اچ میڈیکل سٹی بݨاوݨ دا اعلان کریندے ہوئیں آکھیے جو ایں حوالے نال منصوبے دا  تفصیلی  جائزہ گھنسن۔  انہاں ایں امیدا دا اظہار کیتے جو آندے الیکشن دے نتیجے اچ جیڑھی وی حکومت بݨے ساریاں طاقتاں رل تے پاکستان کیتے آپݨی صلاحتاں بروئے کارگھن آسی ۔ وفاقی وزیر اطلاعات و نشریات  مریم اورنگزیب،   گورنر پنجاب انجینئر بلیغ الرحمن، نگران وزیراعلیٰ پنجاب محسن نقوی وی ایں موقع تے موجود ہن ۔  واضح رہے جو 500  بیڈزتے مشتمل  نشتر -IIہسپتال نال جنوبی پنجاب دے پرے دے علاقیں دے عوام کوں فیدہ تھیسی ۔