پاکستان تے سری لنکا موجودہ معاشی اوکھ توں وختی نکل آسن ،وزیراعظم شہباز شریف  دی سری لنکا دے صدر رانیل وکرما سنگھے نال ٹیلی فونک  ڳالھ مہاڑ

اسلام آباد۔17جولائی(اے پی پی) وزیراعظم محمد شہباز شریف آئی ایم ایف دے نال معاہدے دے سلسلے اچ پاکستان دی حمایت اتے مدد کرݨ تے سری لنکا دے صدر دا شکریہ ادا کریندے ہوئیں امید ظاہر کیتی اے جو پاکستان تے سری لنکا موجودہ معاشی اوکھ اچوں وختی نکل آسن ۔ وزیراعظم آفس دے میڈیا ونگ توں جاری بیان موجب وزیراعظم  محمد شہباز شریف سری لنکا دے صدر رانیل وکرما سنگھے نال ٹیلی فون تے ڳالھ مہاڑ کیتی ۔وزیراعظم شہباز شریف آئی ایم ایف دے نال معاہدے دے سلسلے اچ پاکستان دی حمایت اتے مدد کرݨ تے سری لنکا دے صدر دا شکریہ ادا کیتے۔وزیراعظم آکھیے تساں پاکستان دے یار تے خیرخواہ دا کردار ادا کیتے،پاکستان دے عوام دی طرفوں تساݙا شکریہ ادا کرینداں ، انہاں آکھیے پاکستان اتے سری لنکا نیڑے بااعتماد دوست ہن ، علاقائی ترقی تے امن کیتے سری لنکا دے کردار کوں خراج تحسین پیش کریندوں۔ انہاں آکھیے امید اے جو پاکستان اتے سری لنکا موجودہ معاشی اوکھ توں نکل آسن ۔سری لنکا دے صدررانیل وکرما سنگھے وزیراعظم دی طرفوں نیک تمنا تے شکریہ ادا کیتے تے جوابی خیر سگالی دے جذبات دا اظہار کیتے ۔ انہاں آکھیے پاکستان ساݙا نیڑے یار اے ، یاراں دی مدد کرݨ ہی یاری اے ۔سری لنکا دے صدر وزیراعظم شہباز شریف دی اوکھے حالات اچ کوششاں تعریف کیتی ۔سری لنکا دے صدر آئی ایم ایف معاہدہ طے پاوݨ تے وزیراعظم کوں مبارخ ݙتی ۔واضح رہے جو وزیر اعظم شہباز شریف دی آئی ایم ایف  دی منیجنگ ڈائریکٹر کرسٹلینا جورجیوا نال ملاقات دے موقع تے سری لنکا دے صدر زور ݙتا ہئی جو آئی ایم ایف پاکستان دی مدد کرے ۔سری لنکا دے صدر ایم ڈی آئی ایم ایف کوں آکھیا ہئی جو دیوالیہ تھیوݨ دی وجہ توں سری لنکا کوں ٻہوں مصیبتاں دا شکار تھیوݨا پیا پاکستان کوں ایں صورت حال توں بچایا ونڄے۔