کھیݙاں دے شعبے کیتے 5 ارب روپے رکھئن، نینگراں کوں درکار وسائل ݙیسوں ، وزیراعظم شہبازشریف دا تقریب توں خطاب

اسلام آباد۔18جولائی  (اے پی پی):وزیراعظم محمد شہبازشریف آکھیے کھیݙاں دے شعبے کیتے 5 ارب روپے رکھئن، ول موقع ملیا تاں تعلیم ، فنی تعلیم اتے کھیݙ دے میدان بݨاوݨ کیتے جتنے وسائل درکار تھئے ݙیسوں ،  نینگر کہیں وی ملک دا سرمایہ ہوندن ،محدود وسائل دے باوجود نینگراں کھیݙ دے میدان اچ پاکستان دا ناں روشن کیتے، پوری قوم  ملک دا ناں روشن کرݨ آلیں کوں خراج تحسین پیش کریندی اے ،زرمبادلہ دے ذخائر اچ گزریل ݙینھ 60کروڑ ڈالر دا ودھارا تھئے، دوست ملکاں دے تعاون نال معاشی اشاریے بہتر تھیندے پئن ، نینگراں دی محنت اتے جدوجہد نال پاکستان اڳوں ودھسی ، اے ڳالھ انہاں اتھاں وزیراعظم یوتھ سپورٹس انیشی ایٹو دے اجرا ءدی تقریب توں خطاب کریندے ہوئیں آکھی اے ۔ ایں موقع تے وفاقی وزیراطلاعات و نشریات مریم اورنگزیب، وفاقی وزیر بین الصوبائی رابطہ احسان الرحمان مزاری ،وزیراعظم دی معاون خصوصی امور نوجوانان شزافاطمہ توں علاوہ کھلاڑیاں دی وݙی تعداد موجود ہئی۔  تقریب توں خطاب اچ وزیراعظم آکھیے قوم دے پتراں تے دھیریں اپݨی محنت نال کھیݙ دے میداں اچ ناں کمائے جئیں تے انہاں کوں خراج تحسین پیش کرینداں ۔ گھٹ وسائل دے باوجود اپݨے ٹرینرز ، کوچ اتے والدین دیاں دعاواں توں پاکستان دا دنیا اچ ناں روشن کیتے ۔پاکستان ٻئے میداناں اچ جے سست روی ݙکھائی اے تاں انہاں نینگراں کھیݙ دے میدان اچ پاکستان دا جھنڈا پوری دنیا اچ اُچا کیتے۔ وزیراعظم آکھیے اڄ 5 ارب روپے داوزیراعظم فنڈ دا اعلان وفاقی وزیر احسان الرحمن کیتے۔ وفاقی وزیر تے معاون خصوصی ٻہوں محنت کیتی اے ، ایں5 ارب روپے اچ کھلاڑیاں دے ٹکٹس ، لاجسٹکس ، رہائش اتے کٹس شامل ہوسن ۔ اے 5 ارب روپے پورے ملک کیتے اٹے اچ لوݨ دے برابر ہن ۔  کروڑاں نینگراں کوں جے صحیح ماحول اتے سہولتاں ملن تاں دنیا دی بہترین ٹیماں توں اے اڳوں نکل سڳدن ۔وزیراعظم آکھیے توقع اے جو آوݨ آلیاں حکومتاں ایندے بجٹ کوں ودھیسن ۔ وزیر اعظم دی معاون خصوصی امور نوجوانان شزا فاطمہ خواجہ خطاب کریندے ہوئیں آکھیے مسلم لیگ( ن ) کھیݙاں دے ودھارے کوں آپݨی ترجیحات اچ رکھیے ،شہباز شریف بطور وزیر اعظم ڈیپارٹمنٹل سپورٹس کوں بحال کیتے ۔حکومت ٹیلنٹ ہنٹ کروائے ہن۔ایں مہینے دے چھیکڑ تے قومی سطح تے مقابلے تھیسن ۔سپورٹس انیشی ایٹو دے تحت کھیݙاں دے ودھارے کیتے 5 ارب روپے رکھیے ڳن۔انڈوومنٹ فنڈ قائم کیتا ویندا پئے ایندے اچ ہر سال ودھارا ۔تقریب توں خطاب کریندے ہوئیں وفاقی وزیر بین الصوبائی رابطہ احسان الرحمان مزاری خطاب کریندے ہوئیں آکھیے گزریل چارسال کھیݙاں دے شعبہ کوں نظر انداز کیتا ڳیا ۔محدود وسائل دے باوجودکھیݙاں دے شعبے دی بہتری کیتے اقدامات چیندے پیوں ۔کھیݙاں دا انفراسٹرکچر بہتر بݨاوݨ کیتے اقدامات کیتے ویندے پئن ۔ وزیراعظم ایں موقع تے چترال توں تعلق رکھݨ آلے ٹیبل ٹینس دے سپیشل کھلاڑی الطاف الرحمان  کوں سپورٹس ویل چیئر مل گھنݨ کیتے ساڈھے ترائے لکھ روپے دا چیک ݙتا ۔وزیر اعظم  سپیشل اولپکس اچ تمغے حاصل کرݨ آلے کھلاڑیاں کوں  50 لکھ روپے دا چیک ݙتا۔وزیراعظم ایں موقع تے پہلی سپورٹس یونیورسٹی دا افتتاح وی کیتا۔