تریمتاں کوں سارے شعبیں اچ نمائندگی ݙے تے ملک کوں ترقی اتے خوشحالی دے رستے تے ٹوریا ونڄ سڳدے ، سپیکر قومی اسمبلی راجہ پرویز اشرف

اسلام آباد۔19جولائی  (اے پی پی):سپیکر قومی اسمبلی راجہ پرویز اشرف آکھیے ساݙیاں تریمتاں دیاں صلاحیتاں دنیا اچ کہیں توں گھٹ کائنی ، تریمتاں کوں سارے شعبیں اچ نمائندگی ݙے تے ملک کوں ترقی اتے خوشحالی دے رستے تے ٹوریا ونڄ سڳدے ۔ تریمتاں دے منشور دے موضوع تے ݙو ݙینھ وار کانفرنس دی اختتامی تقریب توں خطاب کریندے ہوئیں انہاں آکھیے میں کیتے اے وݙے اعزاز دی ڳالھ اے جو میں اڄ ویمن کاکس دی تقریب اچ موجود ہاں ، تریمتاں دی شمولیت دے بغیر کوئی معاشرہ ترقی نی کرسڳدا ، انہاں آکھیے ساݙیاں تریمتاں دیاں صلاحیتاں دنیا دی کہیں تریمت توں گھٹ کائن ، میں تریمت اسمبلی ممبران کوں ٻہوں ذمے واری نال کم کریندے ݙٹھے ، مرد تریمتاں کوں معاشرے اچ اڳوں نکلݨ اچ رہنمائی کرن اسمبلی اچ صنفی امتیاز دے بغیر سارے ارکان برابر ہوندن ، صرف تے صرف معزز رکن قومی اسمبلی ہوندن ۔ راجہ پرویز اشرف دا آکھݨ ہئی جو جݙاں تاں پارلیمان اچ ہیوے تاں اتھاں تساکوں کم کرݨا پوندے ،تریمتاں وختی براہ راست انتخابات اچ نہ آسڳن تاں گھبراوݨا کائنی ، اپݨی متعلقہ سیاسی جماعت دے نال اپݨی وابستگی جاری رکھن ، جݙاں سیاسی جماعتاں تریمتاں دی نمائندگی تے چنڳاں سوچیندن تاں ول باقی پارٹیاں وی سوچیسن ، بلوچستان اساں ساریں دا ہے تے اساں سارے ھک ہیسے تریمتاں کوں سارے شعبیں اچ نمائندگی ݙے تے ملک کوں ترقی دے رستے ٹوریا ونڄ سڳدے ۔ کانفرنس اچ تریمتاں کوں بااختیار بݨاوݨ کیتے مثبت تجویزاں پیش کیتیاں ڳئن انہاں تے عمل کرتے چنڳے نتیجے ملسن۔