صدرمملکت ڈاکٹرعارف علوی دا نواں ہجری سال شروع تھیوݨ تے قوم دے ناویں پیغام

اسلام آباد۔20جولائی(اے پی پی) صدر مملکت ڈاکٹر عارف علوی آکھیے بحیثیت قوم ساݙی طاقت سانجھے اتفاق و اتحاد نال ممکن اے ، اساں رل تے کہیں وی چیلنج تے قابو پاسڳدوں تے آپݨے تے آندیاں نسلاں کیتے ھک روشن مستقبل بݨا سڳدوں ، اساکوں پاکستان اچ موجود سارے لوکاں کوں ملک دی ترقی اچ حصہ پاوݨ کیتے موقع ݙیوݨے ہن۔ ہجری نویں سال 1445ھ دے موقع تے قوم دے ناویں آپݨے سنھیے اچ صدر مملکت آکھیے یکم محرم الحرام توں اسلامی ہجری کیلنڈر دا سال 1445ھ شروع تھیندا پئے ۔ میں اللہ تعالیٰ دے حضور دعا کرینداں جو اے ہجری سال پاکستان، پاکستانی قوم، عالم اسلامی اتے ساری دنیا کیتے باعث رحمت و برکت ہووے۔ انہاں آکھیے اسلامی نواں سال شروع تھیوݨ تے پوری دنیا دے مسلماناں کیتے ٻہوں اہمیت رکھیندے ، نواں سال اسلام دی خاطر ݙتیاں ڳیاں قربانیاں کوں یاد کر تے اپݨے ایمان اتے عزم کوں تکڑا کرݨ دا ذریعہ اے ، ایں نویں ہجری سال دے شروع تے اساں ایں ڳالھ دا عزم کریندوں جو آپݨے نبی پاک صلی اللہ علیہ وسلم دی زندگی اتے اُنہاں دی تعلیمات توں سبق گھنسوں تے انہاں دے ݙسائے ہوئے درس کوں آپݨی زندگی اچ رلیسوں ۔ اپݨے معاشرے اچ ہمدردی، انصاف، اتحاد اتے رواداری دے اصولاں کوں برقرار رکھݨ دی کوشش کریسوں ، اے اقدار ساݙے اسلامی ورثے دا مرکز ہن تے اساں ہم آہنگی اتے خوشحالی کوں ودھارا ݙیوݨ کیتے ضروری ہن ۔ صدر آکھیے محرم اسلامی کیلنڈر دا پہلا مہینہ اے، اتے ساݙی روحانی زندگی اچ ھک نواں سفر شروع تھیندے تاں جو محرم ھک ایجھا مہینہ اے جیں اچ اساں آپݨے پیغمبرحضرت محمد صلی اللہ علیہ وسلم دے ݙوہترے سیدنا امام حسین رضی اللہ عنہ اتے انہاں دے عظیم ساتھیاں دی معرکہ کربلا اچ شہادت اتے قربانی کوں یاد کریندوں ۔ معرکہ کربلا اسلامی تاریخ دا ھک اہم واقعہ اے، جیڑھا ظلم دے مقابلے اچ غیر متزلزل جرات، قربانی اتے ثابت قدمی دی مثال اے۔ امام حسین رضی اللہ عنہ اپݨے پیروکاراں دے چھوٹے گروہ نال ناانصافی اتے ظلم دے خلاف اٹھ کھڑے تھئے تے حق و انصاف دے اصولاں کوں برقرار رکھݨ کیتے آپݨی جاناں دا نذرانہ پیش کیتا ۔ امام حسین دی قربانی ظلم دے خلاف کھڑے تھیوݨ تے اسلام دی اقدار دے دفاع دی لازوال یاد دہانی اے۔ اے ساکوں وݙی مصیبت دے باوجود انصاف تے قائم رہݨ دی اہمیت سکھیندے ۔