وزیر خارجہ بلاول بھٹو زرداری دی اپݨے یوکرینی ہم منصب نال مشترکہ پریس کانفرنس

اسلام آباد۔20جولائی(اے پی پی)پاکستان اتے یوکرین تجارت، سرمایہ کاری، زراعت، فوڈ سکیورٹی، دفاعی تعاون، ثقافتی تبادلاں اتے عوام نال رابطیاں سودھا باہمی فائدے دے شعباں اچ تعاون ودھاوݨ تے اتفاق کیتے۔ وزیر خارجہ بلاول بھٹو زرداری یوکرینی ہم منصب دیمیٹرو کولیبا نال ملݨ دے بعد مشترکہ پریس کانفرنس نال خطاب کریندے آکھیا جو یوکرین نال ݙوطرفہ تجارتی و اقتصادی تعلقات ودھاوݨ پاکستان دی ترجیح اے۔ وزیر خارجہ آکھیا جو روس اتے یوکرین وچال جاری جنگ اچ انسانی جاناں دے ضیان تے افسوس اے، ݙوہاں ملکاں وچال مسائل ڳالھ مہاڑ نال حل تھیوݨے چاہیدن جو دیرینہ علاقائی تنازعات ساݙی اجتماعی سلامتی کوں خطرے اچ سٹ سڳدن، یوکرین دے مسلے تنازعہ ترقی پذیر ملکاں اتے گلوبل سائوتھ کیتے خاص کر ایندھن، خوراک اتے کھاد بارے مشکلات پیدا کیتن، پاکستان وی ایندے توں متاثر تھئے، یوکرینی وزیر خارجہ نال ݙوو طرفہ تعلقات، علاقائی و کثیر جہتی امور تے الائے، ساݙے تعلقات اچ تجارت و سرمایہ کاری، زرعی و دفاعی تعاون، ثقافتی تبادلے اتے عوام نال تکڑے روابط شامل ہین، باہمی تعاون ٻیا ودھایا ویسی جو ساݙیاں قوماں دی خوشحالی اتے ترقی اڳو تے ودھے۔ وزیر خارجہ آکھیا جو اساں ݙوطرفہ تعلقات تکڑے کرݨ، روابط دی اہمیت، مختلف ادارہ جاتی میکانزم دے اجلاس کراؤݨ تے اتفاق کیتے۔ انہاں امید کیتی جو روس یوکرین ڄھیڑا تیکھے مکسی اتے خطے اچ آمن آسی، معاملات کوں ڳالھ مہار نال ہی سلڄھاوݨا چاہیدے، امن کیتے پاکستان پورا ہتھ  ونݙاؤݨ کوں تیار اے۔ یوکرین دے وزیرخارجہ دیمیٹروکولیبا پاکستان نال تجارت اتے باہمی تعاون ودھاوݨ دی خواہش کریندے اپݨی سلامتی و خودمختاری دی حمایت تے پاکستان دا شکریہ ادا کیتے۔ ملاقات اچ وزیر مملکت برائے امور خارجہ حنا ربانی کھر اتے سیکرٹری خارجہ ڈاکٹر اسد مجید خان وی موجود ہن۔