اسلام آباد دا ایئرپورٹ 15 سال کیتے آؤٹ سورس تھیسی، کہیں ملازم کوں نی کݙھیا ڳیا، وفاقی وزیر خواجہ سعد رفیق دا قومی اسمبلی اچ توجہ دلاؤ نوٹس تے جواب

اسلام آباد۔21جولائی  (اے پی پی) اسلام آباد دا ایئرپورٹ 15 سال کیتے آؤٹ سورس تھیسی، کہیں ملازم کوں نی کݙھیا ڳیا۔ پی آئی اے دی نویں سروں تشکیل نہ کیتی ڳی تاں اے ݙیݙھ مہینے اچ بند تھی ویسی۔  برطانیہ دی پروازاں آندے ترائے مہینے اچ بحال تھی ویسن۔ اپݨے ایئرپورٹس کوں ٻہترین ٻݨیسوں۔ اسلام آباد ایئرپورٹ دی آئوٹ سورسنگ دے بعد کراچی اتے لاہور دے ایئرپورٹ  آؤٹ سورس کریسوں۔ جمعے کوں قومی اسمبلی اچ وفاقی وزیر برائے ہوا بازی خواجہ سعد رفیق مولانا عبدالاکبر چترالی دے اسلام آباد انٹرنیشنل ایئرپورٹ دی آؤٹ سورسنگ بارے توجہ دلاؤ نوٹس دے ولدے اچ ݙسیا جو دنیا اچ ایئرپورٹ کوں چلاوݨ بارے بہترین کم نجی شعبے دا اے، پڑوسی ملک بھارت دے اٹھ ایئرپورت آؤٹ سورس تھی ڳئن۔  استنبول، مدینہ سودھے ٻہوں ملکاں دے ایئرپورٹس آؤٹ سورسنگ تے چلدے پئن۔ آؤٹ سورسنگ دا مطلب اے نی جو ایئرپورٹس کوں ویچیا ویندا پئے یا اتھوں کہیں ملازماں کوں کݙھیا ویندا پئے۔ اسلام آباد انٹرنیشنل ایئرپورٹ دی آؤٹ سورسنگ نال کئی ملازم بے روزگار کائنا تھیسی۔ اسلام آباد انٹرنیشنل ایئرپورٹ دی آؤٹ سورسنگ اچ ݙیݙھ مہینے لڳسن۔