صدرڈاکٹرعارف علوی قومی اقتصادی کونسل دی تشکیل دی منظوری ݙے ݙتی

اسلام آباد۔1ستمبر(اے پی پی) صدر مملکت ڈاکٹر عارف علوی قومی اقتصادی کونسل دی تشکیل دی منظوری ݙے ݙتی اے ، قومی اقتصادی کونسل دے کل 13 ممبران ہن، وزیر اعظم پاکستان چیئرمین ہوسن ۔ ایوانِ صدر دے پریس ونگ توں جاری بیان موجب قومی اقتصادی کونسل ملک دی مجموعی معاشی صورتحال دا جائزہ گھنݨ تے مالیاتی، تجارتی ، معاشرتی اتے اقتصادی پالیسیز دے حوالے نال منصوبہ بندی دی ذمہ وار اے۔ صدر مملکت قومی اقتصادی کونسل دی تشکیل دی منظوری آئین دے آرٹیکل 156 ھک تے رولز آف بزنس دے تحت ݙتی اے ۔ قومی اقتصادی کونسل اچ وزیر اعظم اتے چارے صوبیں دے وزرائے اعلیٰ شامل ہن۔ قومی اقتصادی کونسل اچ چارے صوبیں توں نگران حکومتاں دے نمائندے وی شامل ہن، پنجاب توں نگران وزیر توانائی و انڈسٹری، کامرس، سرمایہ کاری اتے ہنر مندی ایس ایم تنویر کونسل اچ رلائے ڳئن ۔ سندھ توں وزیر خزانہ ، محصولات ، منصوبہ بندی و ترقی  ،محمد یونس ڈاگھا، خیبر پختونخوا توں وزیر خزانہ ، محصولات، ایکسائز، ٹیکسیشن اتے انسداد منشیات احمد رسول بنگش، بلوچستان توں وزیر خزانہ و محصولات امجد رشید کوں قومی اقتصادی کونسل اچ رلایا ڳئے ۔ وفاق توں وزیر خزانہ ، محصولات ، اقتصادی امور اتے نجکاری وی کونسل دے ممبر ہوسن ۔ وزیرِ منصوبہ بندی، ترقی و خصوصی اقدامات اتے وفاقی وزیر ِمواصلات، ریلویز تے بحری امور وی کونسل اچ شامل ہوسن ۔ قومی اقتصادی کونسل اچ نگران وفاقی وزیر توانائی اتے پٹرولیم کوں وی شامل کیتا ڳئے۔