نگران وزیراعظم انوار الحق کاکڑ عالمی اقتصادی فورم دے 54 ویں سالانہ اجلاس اچ شرکت سانڳے زیورخ پڄ ڳئن

اسلام آباد۔14جنوری(اے پی پی) نگران وزیراعظم انوار الحق کاکڑ عالمی اقتصادی فورم(ڈبلیو ای ایف) دے 54 ویں سالانہ اجلاس اچ شرکت سانڳے سوئٹزرلینڈ دے شہر زیورخ  پڄ ڳئن ۔ نگران وزیراعظم عالمی اقتصادی فورم دی اڄوکے سال دی تھیم دے حوالے نال عالمی جھیڑے روکݨ ، عالمی نظام تےاعتماد دی بحالی اتے معاشی بحران مکاوݨ دی حکمت عملی دے موضوعات تے مبنی تقریب اچ شرکت کریسن ۔ وزیر اعظم آفس دے پریس ونگ توں جاری بیان موجب زیورخ  آمد تے پاکستان دے جنیوا اچ مستقل مندوب بلال احمد، سوئٹزرلینڈ اچ پاکستان دے سفیر عامر شوکت اتے اعلیٰ سفارتی حکام نگران وزیرِ اعظم دا استقبال کیتا۔ نگران وزیر اعظم’’ ٹریڈ ٹیک ٹریلین ڈالر پرامس‘‘دے موضوع تے تقریب توں خطاب کریسن ۔ ایں توں انڄ وزیرِ اعظم بین الاقوامی سرمایہ کاراں نال پاکستان اچ سرمایہ کاری دے حوالے نال ڳالھ مہاڑ کریسن ۔ فورم دے موقع تے وزیراعظم عالمی سیاسی شخصیات اتے سرمایہ کاراں و کاروباری رہنماواں  نال ملاقاتاں کریسن ۔