عالمی سطح تے اقتصادی تعلقات ودھاوݨ سانڳے پاکستانی حکومت پرعزم اے، جام کمال خان

اسلام آباد۔5جولائی(اے پی پی) وفاقی وزیر تجارت جام کمال خان آکھیے عالمی سطح تے اقتصادی تعلقات ودھاوݨ سانڳے پاکستانی حکومت پرعزم اے۔ وزارت تجارت توں جاری اعلامیہ موجب اے ڳالھ وفاقی وزیر تجارت پاکستان اچ سویڈن دے سفیر ہنریک پارسن نال ملاقات اچ آکھی اے ۔ انہاں آکھیے وزیر اعظم دی ترجیح نہ صرف ݙو پاسے بلکہ سہ فریقی فریم ورک دے ذریعے اقتصادی تعلقات ودھاوݨ اے۔ وفاقی وزیر تجارت آکھیے انفارمیشن ٹیکنالوجی دے شعبے اچ پاکستانی نینگراں ٻہوں کامیابیاں حاصل کیتن ، ساݙے نینگراں بہترین کارکردگی دا مظاہرہ کریندے پئن ۔  جام کمال خان آکھیے حکومت قومی تے بین الاقوامی کاروباری برادریاں کوں سہولتاں ݙیوݨ سانڳے پرعزم اے۔ ساݙا مقصد ھک ایجھا ماحول بݨاوݨ اے جتھاں کاروبار ترقی کر سڳن تے ساݙی اقتصادی ترقی اچ اپݨا حصہ پا سڳن ۔ ایں موقع تے سفیر ہنریک پارسن پاکستان اچ کاروبارکرݨ آلی سویڈن کمپنیاں دا ذکر کریندے سویڈن دی کمپنیاں پاکستان اچ بہترین سازگار ماحول اچ کم جاری رکھیا ہویا اے ساریاں کمپنیاں منافع بخش کاروبارکریندیاں پئن۔ انہاں آکھیے میں ذاتی طور تے پاکستان اچ سرگرم سارے سویڈش کمپنیاں نال ملاقات کیتی انہاں اچوں کہیں کنے وی آکھݨ کوں کجھ منفی نہ ہئی انہاں آکھیے پاکستان اچ سازگار کاروباری ماحول توں سارے لوکاں کوں فیدہ چاوݨاں چاہیدے کیوں جو پاکستان دے اندر انفارمیشن ٹیکنالوجی (آئی ٹی)، انجینئرنگ اتے تعلیم دے شعبیں اچ ٻہوں صلاحیتاں ہن ۔ انہاں مزید آکھیے سویڈن تے پاکستان وچال ݙوپاسے تجارت مزید ودھاوݨ دی لوڑھ اے۔ پاکستان پوری دنیا سانڳے بین الاقوامی تجارت دا مرکز بݨݨ دی صلاحیت رکھیندے۔ انہاں آکھیے پاکستان تے سویڈن دے تعلقات صرف تکڑے کائنی بلکہ ٹھوس اتے پائیدار ہن، جیڑھے پائیدار اقتصادی شراکت داری سانڳے اہم ہن۔