اسلام آباد۔25فروری(اے پی پی)اکادمی ادبیات پاکستان اچ ‘پاکستان میں زبانوں کا تنوع: حیثیت، حقوق اور شناختی قبولیت’ بارے کانفرنس تھئی جیڑھی سندھی لینگویج اتھارٹی اتے اکادمی ادبیات پاکستان کرائی اے۔ کانفرنس دا مقصد پاکستان اچ لسانی تنوع اتے ساریاں زباناں دی ہکو سویں حیثیت دی قبولیت کیتے ڳالھ مہاڑ ٹورݨ ہا۔ سابق چیئرمین سینیٹ اتے سینئر سیاستدان رضا ربانی کانفرنس نال خطاب اچ پاکستان اچ زباناں دی تحریک تے الایا اتے مطالبہ کیتے جو اردو اتے انگریزی کوں سرکاری زبان برقرار رکھیندے ہوئے پاکستان دیاں ساریاں مادری زباناں کوں قومی زباناں دا درجہ ݙتا ونڄے۔ رضا ربانی ساریاں سیاسی جماعتاں اتے ساریاں صوبیاں کوں زور ݙتے جو او آئین دے آرٹیکل 251 بی دا بھرپور استعمال کریندے اپݨے صوبیاں اچ صوبائی زباناں کوں صوبے دی سرکاری زباناں قرار ݙے تے انہاں دے ودھارے کیتے کم کرن، ایں سانڳے آئین دے آرٹیکل 253 ۔بی اچ ترمیم دی لوڑھ اے جو صوبیاں کوں ریاستی و سرکاری وسائل مقامی زباناں اتے ثقافتی سنڄاݨ سانڳے استعمال کرݨے چاہیدن۔
تقریب نال معروف دانشور جامی چانڈیو لسانی تنوع بارے تاریخی و عالمی حوالے پیش کیتن۔ کانفرنس دے میزبان، سندھی لینگویج اتھارٹی دے چیئرمین ڈاکٹر اسحاق سمیجو آکھیا جو ساریاں زباناں کوں قومی زباناں دا درجہ ݙیوݨ نال اردو یا انگریزی کوں کوئی خطرہ نا ہوسی۔
انڈس کلچرل فورم دے سابق چیئرپرسن اتے سرگرم رکن منور حسن، معروف دانشور و مصنف انعام شیخ، بلوچی زبان دان و مصنف ڈاکٹر واحد بخش بزدار، پشتو دانشور و ادیب احمد خلیل، معروف دانشور و صحافی مظہر عارف وی کانفرنس نال خطاب کیتے۔
کانفرنس دے چھیکڑ تے مطالبات پیش کیتن جیندے اچ پاکستان دیاں مادری زباناں کوں قومی زباناں دا درجہ ݙیوݨ شامل اے، پرائمری سطح تے تعلیم مادری زباناں اچ ݙیوݨ دا آکھیا ڳئے اتے آکھیا ڳئے جو ریاستی سطح تے لسانیات دے ادارے ٻݨا تے ساریاں زباناں دےو دھارے سانڳے ریاستی وسائل مختص کیتے ونڄن
