نینگراں کوں جدید تعلیم و ٹیکنالوجی نال آراستہ کرݨ حکومت دی اولین ترجیح اے، وفاقی وزیر سائنس و ٹیکنالوجی دا نیوٹیک دے چوتھے کانووکیشن نال خطاب

اسلام آباد۔ 3 دسمبر (اے پی پی) وفاقی وزیر سائنس و ٹیکنالوجی خالد حسین مگسی آکھیے نینگراں کوں جدید تعلیم و ٹیکنالوجی نال آراستہ کرݨ حکومت دی اولین ترجیح اے ، قوم دا مستقبل اِنہاں گریجویٹس نال جُڑیا ہویا اَے جیڑھا جو پاکستان کوں ترقی دے نویں رستے تئیں گھن ونڄ سڳدے ۔ وزارتِ سائنس و ٹیکنالوجی توں جاری بیان موجب وفاقی وزیر نیشنل یونیورسٹی آف ٹیکنالوجی دے چوتھے کانووکیشن وچ شرکت کیتی جِتھاں 244 ایم ایس اَتے بی ایس طالب علماں آپݨیاں ڈگریاں گھدیاں ۔ اے موقع نیوٹیک دی ست سالہ تعلیم دے کامیاب مُکݨ دی وی نشاندہی کریندے۔ تقریب نال خطاب کریندے وفاقی وزیر خالد حسین مگسی آکھیے گزریل ست سالاں وچ نیوٹیک 700 توں ودھ ایم ایس اَتے بی ایس گریجویٹس پیدا کیتن اَتے ایں انجینئرنگ اَتے ٹیکنالوجی وچ 22 انڈرگریجویٹ اَتے گریجویٹ پروگرامز دا اجراء کیتے۔ انہاں یقین ݙیوایا یونیورسٹی لگن اَتے عزم نال آپݨی ترقی جاری رکھیسی ۔ وفاقی وزیر گریجویٹس، انہاں دے والدین اَتے فیکلٹی ممبران کوں ایں کامیابی تے مبارخ پیش کیتی ۔ انہاں گریجویٹس دے اہم کردار تے زور ݙتے، جو انجینئرز، آئی ٹی ماھر اَتے ٹیکنالوجسٹ دی حیثیت نال قومی ترقی وچ حصہ پَیسن اَے اَتے انہاں کوں آپݨاں علم اَتے صلاحیتاں مُلک کیتے وقف کرݨ دی ترغیب ݙتی ۔ نیوٹیک دی صنعت نال تعاون کوں اُجاگر کریندے وفاقی وزیر یونیورسٹی دی قومی صنعتی چیمبرز، ایسوسی ایشنز اَتے وݙے صنعتی اداریں نال کیتی ڳئی شراکت داری دی تعریف کیتی اَے جو طالب علماں کوں تکنیکی اَتے ہُنرمند تربیت کریندی اَے اَتے معاشرتی ترقی و اقتصادی خوشحالی وچ مددگار ثابت تھیندی اَے۔ وفاقی وزیر نیوٹیک دیاں عالمی کامیابیاں دی وی تعریف کیتی اَتے اینکوں ٹیکنالوجی، ترقی اَتے جدت وچ عالمی رہنما قرار ݙتا ، نال ہی ایں دی سائنس انٹرسپلینری رینکنگ وچ ٹاپ 500 یونیورسٹیاں وچ شمولیت دی تعریف کیتی ۔ انہاں فیکلٹی اَتے سٹاف دی محنت دی وی تعریف کیتی جیں یونیورسٹی دے وژن اَتے مشن کوں حقیقت وچ بدلݨ وچ کردار ادا کیتے۔ وفاقی وزیر خالد حسین مگسی سارے گریجویٹس اَتے ایوارڈ گھنݨ آلیں کوں مبارخ ݙتی اَتے انہاں کوں صنعت، معاشرے اَتے مُلک دی خدمت وچ اہم کردار ادا کرݨ دی ترغیب ݙتی اے۔ انہاں آکھیے اے کانووکیشن علم دے عملی استعمال دے ذریعے قوم دی تعمیر وچ ہک نویں آغاز دی نمائندگی کریندے۔