اسلام آباد۔ 3 دسمبر (اے پی پی) وزیراعظم محمد شہباز شریف انڈونیشیا کوں چھل تے تودے ڈِھݨ نال تھیوݨ آلی تباہی توں بعد بحالی اَتے تعمیر نو وچ مدد دی پیشکش اَتے ہر ممکن مدد دا یقین ݙویندے آکھیے پاکستان اَتے انڈونیشیا موسمیاتی تبدیلی اَتے ایں دے سبب پیدا تھیوݨ آلی آفتاں توں ہکوجیہے طور تے متاثر ہِن ۔ اے ڳالھ انہاں انڈونیشیا دے صدر پرابوو سوبیانتو نال ٹیلیفون تے …
وزیراعظم محمد شہباز شریف دی انڈونیشیا دے صدر پرابوو سوبیانتو نال ٹیلیفون تے ڳالھ مہاڑ، انڈونیشیا کوں چھل پاروں تھیوݨ آلی تباہی توں بعد بحالی وچ مدد دی پیشکش اَتے ہر ممکن مدد دا یقین ݙیوایا
مزید خبراں
اسلام آباد۔ 3 دسمبر (اے پی پی) وزیراعظم محمد شہباز شریف انڈونیشیا کوں چھل تے تودے ڈِھݨ نال تھیوݨ آلی تباہی توں بعد بحالی اَتے تعمیر نو وچ مدد دی پیشکش اَتے ہر ممکن مدد دا یقین ݙویندے آکھیے پاکستان اَتے انڈونیشیا موسمیاتی تبدیلی اَتے ایں دے سبب پیدا تھیوݨ آلی آفتاں توں ہکوجیہے طور تے متاثر ہِن ۔ اے ڳالھ انہاں انڈونیشیا دے صدر پرابوو سوبیانتو نال ٹیلیفون تے ڳالھ مہاڑ کریندے آکھی۔ وزیر اعظم دفتر دے میڈیا ونگ توں جاری بیان موجب وزیراعظم محمد شہباز شریف انڈونیشیا دے صدر پرابوو سوبیانتو نال ٹیلیفون تے رابطہ کیتا اَتے اڄوکی قدرتی آفت، چھل تے تودے ڈِھݨ نال انڈونیشیا وچ تھیوݨ آلی تباہی خاص طور تے سماٹرا وچ قیمتی جاناں دے ضیان تے انڈونیشیا دی عوام اَتے حکومت نال پاکستان دی حکومت اَتے عوام دی طرفوں دلی تعزیت اَتے ہمدردی کیتی ۔ وزیراعظم انڈونیشیا دے صدر نال ڳالھ مہاڑ کریندے انہاں نال پوری یکجہتی دا اظہار کیتے اَتے پاکستان ولوں ہر ممکن امداد و معاونت دا یقین ݙیوائے۔ وزیراعظم آکھیے پاکستان قدرتی آفتاں وچ آپݨے تجربیں دی روشنی وچ انڈونیشیا نال وݙے پیمانے تے چھل دی صورتحال توں پیدا تھیوݨ آلے ہنگامی حالات، بحالی اَتے تعمیر نو دے کم وچ مدد کرݨ کیتے تیار اَے۔ وزیراعظم آکھیے پاکستان اَتے انڈونیشیا ݙوہیں مُلکاں موسمیاتی تبدیلی اَتے ایں دے سبب پیدا تھیوݨ آلی آفتاں توں ہکوجیہے طور تے متاثر ہِن وزیراعظم ݙوہیں ملکاں کیتے قدرتی آفتاں توں بچݨ ، آفت دے دوران صحیح ویلھے تے ردعمل اَتے موسمیاتی تبدیلیاں نال نبڑݨ دی صلاحیت دے ودھارے کیتے آپت دے تعاون ودھاوݨ دی اہمیت کوں وی اُجاگر کیتا ۔ انڈونیشیا دے صدر پرابوو سوبیانتو وزیراعظم ولوں انڈونیشیا دے عوام نال اظہار یکجہتی اَتے جانی نقصانات تے تعزیت تے وزیراعظم دا شکریہ ادا کیتا ۔ انہاں ݙسیا انڈونیشیائی حکام ایں قدرتی آفت نال نبڑݨ کیتے جلدی اَتے موثر اقدامات کیتِن ۔ وزیراعظم آکھیا او آوݨ آلے ہفتے انڈونیشیا دے صدر دے پاکستان دے سرکاری دورے دے منتظر ہِن ۔ وزیراعظم آکھیے جو دورہ ممکنہ طور تے ݙوہیں ملکاں دے رہنماواں کوں آپت دے دلچسپی دے سارے شعبیں اَتے ݙو طرفہ سفارتی تعلقات کوں مزید مضبوط بݨاوݨ دا اہم موقع ݙیسی۔
