وفاقی وزیرِ پیٹرولیم دی صدارت اچ  او ایم اے پی اَتے او سی اے سی دے نمائندیں دا اجلاس

اسلام آباد۔ 3 دسمبر(اے پی پی) وفاقی وزیرِ پیٹرولیم علی پرویز ملک دی صدارت اچ آئل مارکیٹنگ ایسوسی ایشن آف پاکستان (او ایم اے پی) اَتے آئل کمپنیز ایڈوائزری کونسل (او سی اے سی) دے نمائندیں دا اجلاس منعقد تھیا ۔ اجلاس وچ قومی پیٹرولیم سپلائی چین دی مضبوطی اَتے جدید تقاضیں نال ہم آہنگی کیتے صنعتی مشوریں تے ڳالھ مہاڑ کیتی ڳئی ۔ ترجمان پیٹرولیم ڈویژن موجب اجلاس دے دوران سٹیک ہولڈرز پیٹرولیم ویلیو چین وچ شفافیت، کارکردگی اَتے مضبوطی گھن آوݨ کیتے جامع مشورےپیش کیتن ۔ وفاقی وزیر اِنہاں سفارشاں دا خیرمقدم کریندے آکھیے حکومت اصلاحات دے عمل کیتے پُرعزم اے ، اساں سارے سٹیک ہولڈرز دی رائے کوں قدر دی نگاہ نال ݙیکھدوں ۔ وفاقی وزیر ریگولیٹر کوں ہدایت کیتی اَے جو صنعت دی نشاندہی کیتے نکتیں تے توجہ ݙیوے ، اساں رَل تے پیٹرولیم سیکٹر وچ ایجھا بدلاؤ گھن آسوں جو صارفین، کاروباری برادری اَتے ملکی معیشت کیتے فیدہ مند ہوسی۔ وفاقی وزیر ایں عزم دا اعادہ کیتے حکومت دے وسیع تر اصلاحاتی اقدامات دے تحت پاکستان تکھے ڈیجیٹلائزیشن ول ودھدا پئے، انہاں آکھیے پیٹرولیم سپلائی چین کوں وی جدید تقاضیں موجب ڈھالݨا ہوسی ۔بہتر نگرانی، معیاری خدمات اَتے دیرپا بہتری کیتے ڈیجیٹلائزیشن ضروری اے ۔ او سی اے سی اَتے اے ایم او پی دے نمائندیں صنعت دی قیادت نال براہِ راست مشورے دے اقدام دی تعریف کریندے اینکوں خوش آئند قرار ݙتے۔ انہاں آکھیے حکومت دا سٹیک ہولڈرز نال ٻہہ تے اساݙے مشورے سُݨݨ حوصلہ افزا اے۔