مربوط حکمتِ عملی نال پولیو کیسز 74 توں گھٹ تھی تے 30 رہ ڳئِن ، وفاقی وزیر برائے قومی صحت سید مصطفیٰ کمال

اسلام آباد۔ 4 دسمبر (اے پی پی)  وفاقی وزیر برائے قومی صحت سید مصطفیٰ کمال آکھیا  جو مربوط حکمتِ عملی نال پولیو کیسز 74 توں گھٹ تھی تے 30 رہ ڳئِن۔ اے ڳالھیں انہاں جنیوا اچ گاوی بورڈ میٹنگ اچ پاکستان دی نمائندگی کریندیں ہوئیں کیتے ۔ وزیر صحت انسدادِ پولیو اَتے حفاظتی ٹیکہ جات اچ چنڳی پیش رفت بارے ݙسیا۔ انہاں آکھیا جومعمول دے حفاظتی ٹیکیاں دی کوریج اچ وݙی بہتری ریکارڈ کیتی ڳئی اَے۔ زیرو ڈوز نیاندر دی نشاندہی اَتے پُہنچ حکومتِ پاکستان دی مُوݙھلی ترجیح اَے۔ وزیرِ صحت ای پی آئی اَتے پی ای آئی ٹیماں دے نال کمیونٹی ہیلتھ ورکرز دی لگاتار محنت کوں سراہیا۔ وزیرِ صحت حفاظتی ٹیکیاں دی کوریج اچ ودھارے اَتے ہر ٻال دے محفوظ مستقبل دے عزم دا اعادہ کیتَے۔ ای پی آئی اَتے پی ای آئی دے سانجھے اقدام نال مئی اَتے ستمبر اچ 4 لکھ زیرو ڈوز نیاندر دی نشاندہی تھئی۔ اعلیٰ معیار دی پولیو مہماں دے نتیجے اچ لکھاں ٻالیں تئیں ویکسین دی پُہنچ کوں پکا بݨایا ڳئَے، سید مصطفیٰ کمال آکھیا جو سال 2025 دے چھیکڑ اچ پولیو مہم دا انعقاد 15 توں 21 دسمبر کوں کیتا ویسی۔ قومی پولیو مہم اچ 4 لکھ توں ودھ پولیو ورکرز خدمتاں ݙیسن ۔ قومی مہم دے دوران 4 کروڑ 50 لکھ توں ودھ ٻالیں کوں پولیو توں بچاؤ دے قطرے پلائے ویسن۔