پاکستان دے ترقیاتی مسئلیں دی بنیادی وجہ سیاسی استحکام، تسلسل اَتے ٻالاں تے سرمایہ کاری دا فقدان اے، احسن اقبال

اسلام آباد۔ 17 دسمبر (اے پی پی) وفاقی وزیر منصوبہ بندی، ترقی اَتے خصوصی اقدامات احسن اقبال آکھیے جو پاکستان دے ترقیاتی مسئلیں دی بنیادی وجہ پالیسیاں یا خیالاں دی کمی نی بلکہ سیاسی استحکام، تسلسل اَتے ٻالاں تے مسلسل سرمایہ کاری دا نہ ہووݨ اے یونیسف اَتے پائیڈ دے اشتراک نال منعقدہ کانفرنس توں خطاب کریندے انہاں آکھیے جو صرف فزیکل انفراسٹرکچر (سڑکاں، عمارتاں) بامعنی ترقی دی ضمانت نی بݨ سڳدا۔ انہاں آکھیے جے تئیں سماجی و معاشی بنیاد مضبوط نہ ہووے، سرمایہ کاری سیمٹ اَتے سٹیل توں زیادہ اہمیت نی رکھیندی ۔احسن اقبال افسوس نال آکھیے جو پاکستان دی سیاسی تاریخ وچ کہیں وی معاشی منصوبے کوں تسلسل نال اڳوں نی ودھݨ ݙِتا ڳیا ۔ پروگرام ول ول تُرٹدے رہین جیں پاروں مطلوبہ نتیجے حاصل نہ تھی سڳئے ہن ۔ انہاں پائیدار ترقی دے چار ستون بیان کیتن امن، سیاسی استحکام، طویل المدتی پالیسی تسلسل اَتے مسلسل اصلاحات۔وفاقی وزیر بھارت، بنگلہ دیش، ملائیشیا اَتے سنگاپور دی مثال ݙیندے آکھیے جو وݙے عرصے تئیں مستحکم حکمرانی نال اتھاں دیاں معیشتاں بدلین ۔ انہاں انسانی ترقی تے ڳالھ کریندے تعلیم اَتے ٻالاں دی فلاح کوں قومی ترجیح بݨاوݨ تے زور ݙِتے ۔انہاں 2023 دی مردم شماری دا حوالہ ݙیندے آکھیے جو آبادی دے ودھݨ دی شرح 2.55 فیصد سالانہ تھئی ڳئی اے اَتے ہر سال 65 لکھ توں ودھ ٻال پیدا تھیندے پئن ۔ احسن اقبال ٻالاں وچ غذائی قلت (اسٹنٹنگ) تے شدید تشویش دا اظہار کریندے آکھیے جو پاکستان وچ 40 فیصد ٻال جسمانی اَتے ذہنی طور تے پُوری طرح نشوونما نی پا سڳدے پئے ۔ انہاں آکھیا اے جو مستقبل محفوظ بݨاوݨ کیتے ٻالاں دی غذائی قلت ختم کرݨی پوسی۔